Vawiin khan NLUP Conference Hall ah kan hma lawka inthlanpui lo awm tur atana EVM-VVPAT leh Vote chhiar leh inthlan result puan chungchanga Nodal Officer leh Master Trainer atana ruat te pualin Training buatsaih a ni.

Chief Electoral Officer Pu Ashish Kundra, IAS chuan training sawihawnna neiin Nodal officer te leh Master Trainer te chu inthlanna dik, thianghlim leh felfai a awm theih nan an District awmna theuh a election official te zirtir chu an hna anih avangin an mawhphurhna a sang hle a ni a ti a, an tihtur leh tihloh tur te an hriat bel hneh hle a ngai a, midangten an harsatna leh hriatthiamloh ah te zawhna an neihin rinthu mai maia chhang lo tura chahin chhan harsa deuh a awm anih pawhin hotu lian zawkte hnena thlen hreh lo turin a chah a ni.

Electronic Voting Machine chungchangah engkim fimkhur taka kalpui a tul thu sawiin EVM chet dan zawng zawng te uluk taka dan in a phut anga kalpui turin Nodal Officer te a chah a, polling station kilkhawr deuh, tlawh pawh zung zung a harsatna hmunah te Voter Verifiable Paper Audit Trail (VVPAT) spare ken tel tura ruahmanna siam anih tur thu a sawi bawk a ni.

Vawiin Training hi chhawng li a then ani a, a hmasa berah “Overall Management of EVM/VVPAT” thupuia hmangin Pu CC Lalchuangkima, Dy. CEO in zirtirna a pe a, hemi zawh hian Pu H.Lalrinpuia, SLMT in “Counting & Declaration of Results” chungchang zirtirna pe in, chawhnu lamah “Hands-on Training” thupuia hmangin Dr. Malsawmtluanga Fanchun, SLMT in zirtirna a pe a, Jt. CEO Pu H.Lianzela hovin sawihona leh zawhna leh chhanna hun hman a ni.