No.3071/2021-2022

Aizawl 21st Noember 2021: Nimin khan Gauhati Medical College & Hospital Auditorium, Bangagarh-ah India Hmarchhak State Education Minister-te thutkhawm 'North East Education Conclave' neih a ni a, Union Education Minister Dharmendra Pradhan chu Khuallian a ni a. He hunah hian Assam Chief Minister Dr. Himanta Biswas Sharma chu Khualzahawm niin Hmarchhak state 8-a Education Minister 8-te chu Khualtha an ni vek bawk.

North East Education Conclave-ah hian School Education Minister Pu Lalchhandama Ralte pawhin thusawiin Mizoramin zirna lama hma a lak dan leh hma a sawn dan bakah mamawh hrang hrangte a tarlang a. Chung zingah chuan sawrkar laipuiin zirna kalphung thar 'New Education Policy'(NEP) 2020 hman tura a chhawp chhuak chu lawmawm a tih thu te, NEP 2020 kalpui tura hmalak dan tur chi hrang hrang - hun awh rei leh rei lo chi ruahmanna siam a nih bakah zirna lama mithiam thiau telna Committe hrang hrang din a nih thu te leh heng ruahmanna hmang hian Mizoram State chhungah zirna tha zawk neih thuai beisei a nih thu a sawi. Minister chuan sawrkar laipui hmalakna peng hrang hrang Nipun Bharat, Ek Bharat Shreshtha Bharat, Fit India, Swachh Bharat Swachh Vidyalaya, Covid-19 Campaign leh Constitution Day a kalpuite chu lawmawm a tih thu leh Samagra Shiksha Scheme hnuaiah hmun kilkhawr zawka chengten zirna an ban phak nana Netaji Subhash Chandra Bose Avasiya Vidyalaya a kalpui chu thil lawmawm tak a nih thu a sawi bawk.
  
Hemi rual hian zirna lama hmarchhak state hrang hrangte harsatna leh mamawhte tarlang telin Mizoram School Education Minister Pu Lalchhandama Ralte chuan Right to Education (RTE) Act, 2009 Section 7(3)-in a tarlan anga sawrkar laipuiin state sawrkar-te sum mamawh a pek dan tur ruahmannaah state sawrkar nena indawrtawnna hun a bichilh avangin Samagra Shiksha Scheme hnuaia zirtirtu leh Teacher Educator-te hlawh tur sawrkar laipuiin a ruahman chu zaa 50 dawnin a tlahniam a, hei hian state sawrkar tan harsatna namen lo thlenin sawrkar hmalakna thar tam tak pawh a kalpui mumal thei lo a ni, a ti a. Samagra Shiksha kalphung thar hnuaiah State sawrkarte rawtnain ngaih pawimawh a hlawh tawk loh avangin zirlaibu a thlawna sem kawngah te, school uniform a thlawna peknaah leh zirlai chawl tawh Secondary School lama kaitir tura sum ruahman pawh a beitham em avangin hmalak a harsat thu te, Primary School zirtirtu indaih lohna te leh ICT hmanga zirna kalpui turin network connectivity rintlak a tul thu te, Pre-School kalpui turin Department dang nena a inthuaha hmalak a nih loh nan kum bithliah tih fel a tul thu te a sawi bawk.
  
Pu Lalchhandama Ralte chuan Higher Education lama hmalakna leh harsatna hrang hrang tarlangin chung zingah chuan NEP 2020 kalpui mek dan te, Centrally Sponsored Scheme (CSS),  sawrkar laipui leh state sawrkar thawhdunna hnuaia thawktu lakna tur sum chungchang te bakah RUSA hnuaia hmalakna atana sum mamawhte leh RUSA 3.0 atana sum ruahman cheng vaibelchhe sang thum la tangkhang chungchangte pawh a tarlang a ni.
  
Mizoram School Educatiom Minister hi Dr.Lalzirmawia Chhangte, Secretary, School Education leh Pu Lalhmachhuana, State Project Director, Samagra Shiksha-ten an tawiawm a ni.

Attachment

  • Loading attachment...