Vawiin khan NLUP Conference Hall-ah North East Farmers’ Federation din a ni a, he dinna inkhawm hi Pu H.Liansailova, Agriculture Minister in a hmanpui a, Arunachal Pradesh, Nagaland leh Tripura atangin palai an lo kal a. Inkhawm hi Dr. H. Vanlalhluna, Vice President, AMFU in a kaihruai a ni.

Pu Liansailova chuan India hmarchhak loneitu intelkhawmna pawl an din chu lawmawm a tih thu sawiin he pawl hian an harsatna hrang hrangte sutkian dan tur sawiho in an tawnhriatte an intawm thei tawh dawn a ni a ti. India hmarchhak mite hian eizawnna ngelnghet kan nei lo tlangpui a, Mizoram ah chuan eizawnna nghet mipuiin an neih theihnan NLUP tan anih tawh thu te Minister chuan sawiin kan buh leh bal tharchhuahte hi India hmundang aiin a tlem a, chuvang chuan India Hmarchhak mite hian kan lo neih dan kawng hmang leh chin dan hi kan thlak a ngai tawh a ni, a ti a. Agriculture hi eizawngna tling a kan siam loh chuan kan thangtharte hian lo neih hi an bansan mai a hlauawm a chuvang chuan North East Farmers’ Federation hian hralhchhuah that lamah tan an lak ngai a ni, Minister chuan a ti bawk.

Inkhawm ah hian Pu Zion Lalremruata, Gen Secy AMFU in he pawl thil tum te sawina hun a hmang a, Pu Lanukaba, President, CONFU, Nagaland in lawmthusawina a nei a ni.