1426/2022-2023
Aizawl 1st August 2022: Ni 3 awh (July 29 - 31, 2022) North East India Festival, 2022 chu Bangkok, Thailand-ah neih a ni a. Mizoram atangin Tourism Minister Pu Robert Romawia Royte ho in Tourism Department officials leh tour operator pahnih ten an chhim a ni.
He Festival hi Indian Embassy, Thailand, Ministry of External Affairs leh Travel MMS ten vawihnih an buatsaihna niin India hmarchhak State te leh Thailand in tourism leh sumdawnna chi hrang hrang, a bik takin trade investment lamah te inkungkaihna ṭha an neih theih nan huaihawt a ni.
Tourism Minister Pu Robert Romawia Royte chu a zan khatnaah khual zahawm niin Mizoramah investment opportunities a that thute a sawi a, Thailand Tour Operators te chu Mizoramah khualzin a tam thei ang ber rawn thawn thin turin a sawm bawk.
Khuallian leh khual zahawmte zingah mi pawimawh tak tak H.E Jurin Laksanawisit, Deputy Prime Minister of Thailand, Dr. Rajkumar Ranjan Singh, Union Minister of State for External Affairs and Education, Conrad Sangma, Chief Minister, Meghalaya, Neiphiu Rio, Chief Minister, Nagaland, Chowna Mein, Deputy Chief Minister of Arunachal Pradesh leh State hrang hrang Ministerte bakah Royal Thai Government aṭangin mi pawimawh tak tak te an tel a, Thailand-a tourism organization lian ber pahnih - Tourism Association of Thailand leh Tourism Council of Thailand te pawh he Festival ah hian telin, Mizoram sawmna chu tih hlawhtlin ngei an tum thu an sawi bawk.
He ni thum awh programme hi a hmasa ber zanah Centara Grand Hotel a neih niin, B2B meet ah Thailand aṭangin tour operators 150 ten an chhim a, a ni hnihna leh ni thumna hi Centara Grand hotelah leh Central World kawtah neih a ni. Tlai lamah cultural programme te, fashion show te leh live band ten hun an hmang ṭhin a, Mizoram aṭang pawhin cultural troupe mi 16 in Mizo lam chi hrang hrang an entir bakah Mizo Designer Mami Khawlhringin a kutchhuak a pho lang bawk.
Pu Robert Romawia Royte leh Mizoram atanga chhimtute hi July ni 28, 2022 khan Bangkok panin an chhuak a, August ni 2, 2022 ah hian Aizawl an rawn let leh dawn a ni.
Attachment
- Loading attachment...
