Vawiin khan Sports Minister Pu Zodintluanga’n Zaua Sailo hriatrengna 1st North East Shooting Championship chu Kulikawn Indoor Stadium-ah a hawng.
Sports Minister chuan hmarchhak State hrang hrang te silai inkahsiak vawi khatna Mizorama nghah a ni chu lawmawm a tih thu leh Mizoram Chief Minister Pu Lal Thanhawla phurpuina leh hmalakna lawmawm a tih takzet thu a sawi a. Harsatna tam tak paltlanga a hlawhtlinna tura rim taka thawktu Mizoram Rifle Association (MRA) te hmalakna chu chhuanawm tiin Association naupang tak, kum thum vel kal ta a silai kahna (shooting gallery) nei tan chauh ni mah se an thawhrah Mizo naupangte ah a lang tan der tawh a ni, a ti. Mizoram sorkarin Rio Olympics-a Mizo thalai an tel ve ngei theihna tura ruahmanna a siam Vision 2016-a Sports Discipline pakaw thlan chhuah zingah silai kah hi a tel thu a sawi a. MRA te chu sorkar policy Catch them young kalpui tha ber te zinga mi an nih thu a tarlang bawk. Pu Zodintluanga chuan infiamna lama Mizoram sorkar hmalakna thenkhat te tarlangin khelmual pathumah Astroturf phah a nih thu te, Kawnpui Hockey khelmuala Astorturf phah pawh hawn thuai a nih tur thu North East Shooting Championship hawnna inkhawmah hian a tarlang bawk. Sports Minister hian he Championship puala Souvenir buatsaih chu a tlangzarh nghal a ni.
He Shooting Championship hi Kulikawn Indoor Stadium-a MRA Indoor Shooting Range leh Mualpuia Rajiv Gandhi Stadium-ah te neih niin 10mtrs Air Rifle, 10 mtrs Air Pistol, 25mtrs Sports Pistol, 50mtrs Free Pistol, 50mtrs Rifle Prone (Peep sight) leh 50mtrs Rifle Prone (Open sight)-ah te inelna neih a ni a. Assam atangin silai kahthiam 32, Manipur atangin 37, Nagaland atangin 5 leh Mizoram atangin 96-te he inelna-ah hian an tel a ni. Silai inkahsiak endik tur hian National Rifle Association of India aiawhin International Shooting Sport Federation (ISSF) qualified Judge/ Jury mi paruk - Y Binod Kumar, Manipur; Indrajit Singh, Manipur; M Rashbihari Singh, Manipur; Rajen Singh, Assam; Baba Kalita, Assam leh Rituraj Bhagwati, Assam te an lokal a. Shooting Competition hi March 23-ah khar a ni ang.
