Mizoram Journalists’ Association (MJA) leh Environment and Forests Department tangkawp chuan vawiin khan World Forestry Day (March 21) denchhanin E & F Conference Hall-ah Ramngaw leh Nungcha humhalh chungchang ‘Sensitisation Workshop on Protection of Forest, Environment & Biodiversity’ tih an buatsaih a. Workshop hi Pu H. Rohluna, Environment & Forests Minister-in a hawng a ni.

Pu H. Rohluna chuan Mizoram in ram ruak leh forest ram te ngaituaha ramngaw nei tha viau tur kan nih laiin ramngaw tak tak (very dense forest) kan neih chu Mizoram area zau zawnga teha za zelah 0.64 vel chauh a ni a, chuvangin ramngaw humhalh kawnga tun aia nasa leh zawka kan inhrilhriata, kan inzitir a tul a, mipuite hemi kawnga kan harh thar a ngai a ni, a ti a. Ram ngaw humhalh leh a chereu tur venghim turin Department hmalakna chauh chuan hmasawn chak a har thu sawiin, mipui leh tlawmngai pawlte nen tang tlanga, tawhhona tha siama hemi kawnga zirtirna buatsaih leh awmze neia hma lak a tul a ni, a ti.

Minister chuan ramngaw humhalh that chuan tuihna pawh kan humhalh telh anih tih hriat a pawimawh thu sawiin, tuihna ‘catchment area’ humhalhna dan siam a tul a, a tichhetu hremna dan mumal tak neih pawh a tul a ni a ti bawk. Ram ngaw humhalh kawnga mipuiin mawhphurhna pawimawh tak an neih thu sawiin hemi kawnga mipui inhrilhhriatna leh inzirtirna kawngah chanchinbumite nen pawh thawhhona tha neih a tul a tiin tan lak pui turin a sawm a ni.

Workshop hawnna inkhawm ah hian MJA President, Pu C. Lalrambuatsaiha pawhin thu sawiin ramngaw humhalh kawnga neitu rilru pu a, mitin in hma kan lak a tul a ni a ti. Workshop hawnna inkhawm hi PCCF Pu J.L. Singh’n kaihruaiin, Addl. PCCF Pu Rosiama Vanchhong chuan lawmthu a sawi a ni.

Technical Session I, Pu C. Lalrambuatsaiha kaihhruai ah hian Asst. Prof., Dept. of Mass Com. MZU, Nl. Irene Lalruatkimi’n ‘Press, Media and NGOs : Principal Vehicles of Mass Awareness’ tih leh President, CYMA Pu T. Sangkunga’n ‘Ramngaw leh Nuncha Humhalh’ tih paper an buatsaih te chu an zirho a.

Technical Session II Pu Lalthangliana Murray, CF, Central Circle kaihhruai ah hian Assoc. Prof.,ATC, Nl. Dr. Lalrindiki Ralte in ‘Sustainable Development’ tih leh Asst. Prof. ATC Rev. Rosiamliana Tochhong in ‘Thilsiam chunga Kristian te mawhphurna’ tih paper an buatsaih te chu an zirho leh bawk a ni.

Workshop ah hian MJA member thahnem tak leh ramngaw leh nungcha humhalh kawnga hma latu tlawmngai pawl aiawh hrang hrang te pawh an tel a ni.