Vawiin chawhma khan Art & Culture Minister Pu R Romawia chuan Aijal Club-ah North East Writers’ Meet a hawng. North East Writers’ Meet hi North East Zone Cultural Centre (NEZCC), Dimapur; Art & Culture Department leh Mizo Academy of Letters (MAL) tanghoin an buatsaih a ni a.

Hawnna thusawiin Pu R Romawia chuan thuziaktute pawimawh zia leh hnam leh tih dan phung chawinungtu an nih zia leh ram humhalhtu pawimawh tak an nih zia a tarlang a; he meet, MAL Golden Jubilee nen in nanga huaihawt chungchangah hian lawmpuina thu sawiin, hun lokal lehzel turah Mizo hnam tana tan la zel turin a ngen a ni.

Khualzahawm Pu Lipokmar Tzudir, Director, NEZCC Dimapur pawhin thu sawiin, India mipui tam zawk tena an hriat chian loh India hmarchhakah hian hnam engemaw zat kan awm a. Kan hnam ziarang leh thu leh hlate hi vawnghima humhalh ngama tanla zel turin a fuih bawk a ni.

He North East Writers’ Meet ah hian senior citizen te, MAL-a affilated club hrang hrangte bakah helama ziak lama tuimi engemaw zat an tel. Technical Session I ah Prof. Umesh Deka, Guwahati University, Assam; Pu Darchuailova Renthlei, EC Member, MAL & Associate Professor, Govt. Hrangbana College, Aizawl; Prof. D. Kuolie, Nagaland University te paper ziah zirho a ni a. Technical Session II ah Mizo tawng leh Folk theatre chungchanga sawihona neih a ni.