Vawiin khan I&PR Conference Hall-ah Serchhip leh Kolasib District chhunga State Bank of India leh Mizoram Rural Bank Branch Manager zawng zawng te, Aizawl-a an Controlling Office a Senior officer thenkhat leh Mizoram State Rural Livelihoods Mission Official ten SHG-Bank Linkage chungchang zirhona an nei.

Workshop hawngtu Pu Lalrinliana Fanai, Commissioner, R.D. Department, Sorkar laipuiin thingtlang mi retheite dawm kang tura hma a lakna thin SGSY scheme chu National Rural Livelihoods Mission hmanga thlak a nih thu te, Mizoramah pawh Mizoram State Rural Livelihoods Mission (MzSRLM) hminga hma lak tan mek a nih thu te a sawi a. Serchhip District chhung Serchhip Block leh East Lungdar Block te, Kolasib Dist. chhung Thingdawl Block leh Bilkhawthlir Block -ah te theih tawp chhuaha hmalak a nih thu leh heng Block pali-ah hian Self Help Group pawh 700 vel a awm tawh thu a sawi a.

NRLM hmalakna ber SHG chu thingtlang mi rethei te anmahni ngei tangruala an indawmkanna tur a ni tih sawiin, mi rethei ten khawsakphung pangngai leh changkang zawk an thlen theihna turin Bank Manager kalkhawmte chu MzSRLM thawhpui turin a sawm bawk.

He Workshop-ah hian resource person Pu Saurav Roy, Mission Manager (Financial Inclusion) NRLM, New Delhi chuan kalkhawm te a zirtir a. Chawhnu lamah Bank Branch hrang hrang ten an branch theuha Self Help Group account an neih zat leh loan an pek zat te an sawi khawm a, chak zawka hmalakna tur rawtna hrang hrang an neih te leh hmalak zui dan tur an sawi ho a ni.