Vawiin chawhma khan Government Complex Veng a Sports & Youth Serverices Department hmun ah ni 2 awh tur tlanglawn intihsiakna, Lead Beat 2014 Sports Climbing Competition, Adventure Youth Ring, Kanaan Veng leh Unlimited Extreme Obsession(UXO) te buatsaih hawnna programme chu Sports Minister Pu Zodintluanga leh Sports & Youth Services Department leh Mizoram State Sports Council hotuten an hman pui.

Sports Minister chuan sawrkar puihna telova Lead Beat 2014 buatsaih anih chu lawm awm a tih thu sawiin infiamna chi hrang hrang tam zawk ah Mizoram in hlawhtlinna a hmu mek a, Khelmual leh Infiamna hmun thatak tak tam tak sawrkarin a siam tawh lain Adventure Sports ah erawh chuan chak zawka hmalak a ngaih thu sawi a. Sports & Youth Services Department hotute leh an enkawl Adventure Wing a thawkte pawh nasa zawka ngaihtuahna seng turin a chah a. Adventure bika kan hlawhtlinna report pharh a nih chang pawh in kum 10 liamta a mi te kha a ni tawh thina, hmathar kan la anga, thalai ten an tuichilh a, tih tak tak na nen Mizoram piahlam International level thlenga hlawhtlinna hmuh an tum a nih phawt chuan sawrkar chu a tlanchhe dawn lo a ni a ti. Tlanglawn mite inzirna hmun Govt. Complex hmuna artificial climbing wall structure thawm that ngai laite chu State Sports Council in a ngaihtuah sak anga, he tlanglawn zirna hrim hrim pawh hi changtlung zawka thuam a ni dawn a. Aizawl khawpui chhunga Indoor stadium hrang hrang zinga pathum thlan chhuah ah Artificial Climbing wall hi siam a ni ang a. Chumi siamna atana sum mamawh chu, Sports Department chuan budget ah kum 2014-15 atana project hrang hrang a siam zinga alo telh tawh angin dah a ni tawh a ni a ti. Sports & youth Services Director Pu Lalzirmawia chhangte pawhin thusawiin Tlanglawn intihsiak leh adventure hrim hrim hi Mizo thlalaite thiam bik thil a ni a, hetianga tui tur erawh chuan rilru fim leh ruihtheihthil laka insum theihna te bakah chiai lo mi nih te a ngaih thu a sawi a. Tlanglawn intihsiak Mizorama buatsaih reng reng chu Indian Mountaineering Foundation(IMF) duhdan leh bituk chin veka buatsaih a ni tawh a ni a ti.

Govt. Complex a Lead Beat 2014 Sports Climbing Competition buatsaihna Artificial Climbing Wall Structure hi feet 52 a sang a ni a. Intihsiak a teltur te hi khung hran hmasak an nih chhungin an lawnna tur rahbi leh inham tanna te, an inkhaina hrui bahna te leh an zawhchhoh tur hi awmze neia siam danglam vek a ni a, a lawn chhuak te hian la lawn ve lo khung hran mek te hi an be thiang lova. La lawn tur te hian midang lawnlai an en theilo bawk a ni. He intihsiakna rawn pui tur hian Red Bull chuan an team member tlanglawn thiam khawvel hmun hrang hranga tlang hmingthang te lawn tawh an rawn tir a ni. Intihsiakna hi naktuk ah a tiak ang. Lead Beat 2014 hawnna ah hian Stunt Bike show entir a ni a, Yo-yo vawmvir hmuhnawm te bakah awmze neia bang chei ran Graffiti painting show te neih a ni. A huaihawttu pakhat zawk UXO hi Aizawl khawpui a thalai thenkhat Extreme Sports leh Art a tuizual te intelkhawm an ni.