North Eastern Council (NEC) Plenary Session vawi 63-na vawiina Shillonga NEC Auditorium hmuna neihah Chief Minister Pu Lal Thanhawla a tel.

Chief Minister Pu Lal Thanhawla chuan NEC enkawltu DoNER Minister viak tha tak Dr. Jitendra Prasad an nei chu a vanneihthlak hle a ni a ti a. NEC in hmarchhak bial hmasawnna tura hmalak tam tak a neihte chu Central sorkar atanga fund lokal leh Gross Budgetary Support (GBS) a tlem chhoh zel avangin project tam takin a tuar mek a ni a ti a. NEC hian Mizoram ah Rs.801.21 Crore senna tur project 62 a neih mekah June, 2014 thleng khan Rs.422.12 Crore hman a ni tawh a ni a ti a. Hmabak la awm te hi Central sorkar atang additional fund te kan hmuh that loh avangin hmalak zelna tur a huphurhawm hle a ni a ti. Hmarchhak bial hmasawnna tura Central Ministry hrang hrang ten GBS 10% dah hrang tura tih pawh tlemte chauh dah a ni thin tiin, Chief Minister chuan hei hi central sorkarin en tha se a duhthu a sawilang a. Project reng reng kalpui zelna tura installment pekchhuahna tura AG atanga Audted Certificate phut thin pawh nuaibo nise tiin rawtna a siam bawk a ni.

Chief Minister chuan Mizoram chu sum lama harsatna lian nei a nih avangin NEC hnuaia project kalpui thina Mizoram sorkar tum ve tur 'state matching share' pawh hi tihbo nise tiin a sawi bawk a. A hun taka sum hmuh tur pekchhuah a pawimawh a ni a ti a. Hmarchhak bial miten awlsam zawka New Delhi an kal zung zung theihna tur atana Airlines hran siam tur tih chu a reh vang vang a ni tiin, hei hi central sorkarin a hlawhtlinna turin hma la se a ti a. Mizoramah kum hnih chhung helicopter service a awm tawh thu sawilangin, hei hi central sorkarin 75% a tum thu leh state sorkarin 25% a tum ve thin thu a sawi a. Hei pawhi sum lama harsat nei kan nih avangin central sorkar hian 90% min tum sak se tiin rawtna a siam bawk a ni.

Chief Minister hian NEC hnuaia hmalaknaa zirna lam te, inkalpawhna te, Lengpui Airport chei that chungchangte, Rel kawng siam lam te, Tourism te leh Telecommunication lama hmalakna te leh mamawh la awm tam tak te a sawi bawk a. Tripura atanga Bru hruaikir chungchangah Pu Hawla chuan November 2014 thleng an lokirna tur Road Map I-III hnuaiah 6649 lak kir an nih thu a sawi a. Mizoram sorkar bakah Tripura leh central sorkat tangkawp ten sum tam tak senga hruaikir hna an thawhnaah engemawzah chu an kir duh loh avangin an awm duhna hmun Tripura ah an awm hlen theih dan tur ngaihtuahho mai tha a tih thu a sawi bawk a ni.

Plenary session hi NEC Chairman Dr.Jitendra Prasad, DoNER Mnister in a kaihruai a, NEC Secretary Ameising Luikam,IAS in thuhma sawina hun a hmang bawk a ni. Thusawitu zingah hian Pu Hawla bakah Meghalaya Governor, Megahlaya Chief Minister, Manipur Chief Minister,Arunachal Pradesh Governor leh Chief Minister, Sikkim Governor leh Chief Minister, Chief Minister Nagaland leh Assam Governor ten thu an sawi bawk a ni.