1869/2024-2025
Aizawl, the 3rd September, 2024: Nimin September ni 2, 2024 khan Union Minister for Culture & Tourism Pu Gajendra Singh Sekhawat leh Union Minister of State for Tourism Pu Suresh Gopi te kaihhruainain Vivanta, Shillong, Meghalaya-ah North Eastern & Eastern States/ Union Territories Tourism Ministers Conference hman a ni a, he hunah hian Mizoram aiawhin Tourism Minister Pi Lalrinpuii chu a tel a ni.

He Conference-ah hian Mizoram Tourism Minister Pi Lalrinpuii chuan North East State-te Tourism-a hma kan sawn ve theih nan a bik taka ngaihtuah kan ngaih thu Sawrkar laipui hotute hnenah a thlen a. North East khawpuite inkalpawhna tha tak hmanga thlunzawm leh khualhip thei hmunhma tlawh tur neihte tihhmasawn a tulzia sawiin, Sawrkar laipui chu ruahhmanna fel tak ngaihtuah sak turin a ngen a. Mizorama community based tourism kalpui tum dan tlangpuite tarlangin, thing leh mau, ram leilung hausakna leh mawina bakah hnam ziarangte vawnghim chungin thalaite tana subsidy tha tak tak kengtel Entrepreneurship Development Policy leh Programme-te ruahman sak turin Sawrkar laipui hotute a ngen a ni. 

Pi Lalrinpuii chuan he huna tel Khualliante leh Tourism Minister-te chu Mizorama rawn zin tur leh, Mizoram mawina leh khualzinte chunga kan thatnate, kan hnam nunzia leh tihdante rawn hmu ve tura sawmin, indaidannate thiata North East-ah Tourism hmanga danglamna thlen tum theuh turin a sawm nghal bawk.

He hunah hian Tourism Minister Pi Lalrinpuii tawiawmtu Dr. Lalrozama, IAS, Secretary, Tourism Department chuan Department hmalakna leh Mizoram Tourism dinhmun chungchang PowerPoint Presentation hmanga entirin a sawifiah a ni.

Attachment

  • Loading attachment...