1870/2024-2025

Aizawl, the 3rd September, 2024: Taxation Minister Dr. Vanlalthlana chuan vawiin chawhnu dar 1:00 khan a Office Chamber, MINECO ah Petrol leh Diesel-a chhiah tihpun chungchangah  Press Conference a nei. Minister hi Pu S.M. Ali, Secretary, Taxation Department, Pu R. Zosiamliana, Commissioner of State Tax leh Official dangte'n an tawiawm a ni.

He huna Taxation Minister Press Statement chu hetiang hi a ni:-

PRESS STATEMENT OF Dr VANLALTHLANA : 3.9.2024

PETROL LEH DIESEL A CHHIAH TIHPUN CHUNGCHANG

Vawiin ni 3.9.2024 a Petrol leh Diesel atanga chhiah lak - Value Added Tax (VAT) tihpun chungchangah hian Mizoram mipuite hriat ngai inhriatna leh ngen duh hrang hrang ka nei a.

Petrol leh Diesel atanga VAT tihpun hi thil harsa tak leh ngaihtuahna thui tak hman ngai a ni a. Nghawng a neih tur leh mipui ten harsatna an tawh theih tur thil tam tak ngaihtuah lawk a niin hun rei tawh tak atang khan buaipui a lo ni tawh a. Mizoram mipui ten thil man leh veivahna a to kan hlauhna hi ka tawmpui a. Chhiah tipungtu dinhmuna awm hi thil nuam leh awlai lo tak a nih bakah Press mite hmachhawn fo te hi minister tan chuan a hautakin, tawng sual leh mi pawi sawi palh te pawh a hlauhawm a. Hreh tak chungin, Mizoram mipuite tana tha ber tur ngaihtuah chunga ti ka ni tih min hriatpui a, sorkar dinhmun hrethiam chunga he chhiah kan tihpun chhan min ngaihthlak sak turin ka ngen tak meuh a che u.

Kumin kum tir lamah (17.2.2024) khan Mizoram Resource Mobilisation Committee atangin Petrol leh Diesel man tisang tur leh November, 2021-a tihhniam a nih hmaa VAT rate (petrol – 25% leh diesel – 14.55%) hmanga chhiah la leh tura ngenna khauh tak mai Taxation Department chuan kan dawng a. He thil hi ngun taka ngaihtuah a nih hnuah, an ngenna hi a zahawm kan tih bakah kan ruala Petrol leh Diesel man titlemtu, state dangte pawhin an tih to chho leh tawh hlawm tih kan hriat avangin rate thar hmang turin ngaihtuahna kan seng chho ta a.

Petrol leh Diesel a chhiah tihsan tawp ai chuan mipui ten an hriatthiam zawk theih nan tiin Road Infrastructure Cess leh Social Infrastructure Service Cess hmanga tih san chhoh ni se kan ti a. 2^nd July, 2024 a Council of Ministers meeting in Petrol leh Diesel a VAT kan lak tihsan rawtna chu a pawm hnuah Rules siam that ngaite pawh siam that chhunzawm a ni chho va.

Mizoram tan chuan Petrol leh Diesel atanga Cess lak hi thil thar ni mah se state dangte chuan hming chi hrang hrang hmangin an lo la reng tawh a (Cess on POL, Road Infrastructure Cess, Air Ambience Cess, adt). Mizoram-ah hi chuan a vawi khatna niin Mizoram VAT Rules pawh tihdanglam a ni nghe nghe a ni.

Road Infrastructure Cess hi Road Fund Act, 2007 nena kal kawpa lak a niin kawng siamthatna atana hman tur a ni a. He thil hian kawng siamna atan sum kan tlakchhamna chu eng emaw chen chu a tihziaawm dawn bakah kawng siam a hnathawktute, officer te leh minister chenin mawhphurhna (accountability) sang tak a bel dawn a. Kawng siam a nihin litre khata Rs.2 kan pek kan hrechhuak ang a. Tun aia ngun lehzual a kawng siam kan vil bakah kawng tichhe zawnga mimal, sumdawnna leh pawl thil dah thinte pawh an inkiltawih sawt kan beisei a ni.

Social Infrastructure Services Cess hi zirna in tihchangtlunna atan te, hriselna kaihhnawiha hman atan te, skill development leh hmeichhia te chawikanna (women empowerment) atana hman tur a ni a.  He thil hian khawtlanga kan harsatna tam tak pawh a tihziaawm ngei kan beisei tlat a ni.

Mizoram-a chengte hian chhiah kan pek tam loh avangin VAT rate tihsan tawp ai chuan a hmanna tur awm saa chhiah tihpunna siam hi a felfai zawkin mipuite pawh min lo hriatthiam hram turin ka ngen tak meuh a. Petrol leh Diesel man hi sang viau angin lang mah se kum 2 kal taa petrol leh diesel man aiin a la hniam zawk a ni tih min lo hriat sak turin ka ngen leh che u a ni.

4^th November, 2021 khan Petrol leh Diesel chhiah hi Rs.7 a tihhniam a niin a chet hnuhnun ber tum a ni a. Kum 2021 khan Petrol leh Diesel atanga chhiah lak zat kha 25% leh 14.55% ve ve niin Rs.7 a tihhniam a nih hnuah petrol rate chu Rs.107.12 atangin Rs.101.30 ah tla thlain Diesel pawh Rs.97.89 atangin Rs.86.37 ah a tla thla ta kha a ni a (Petrol leh Diesel man hi Rs.7 chiah chiaha a tlakhniam loh chhan chu central sorkarin a man/basic rate a tihchet ve vang a ni). Sorkar hmasain petrol leh diesel a tihtlawm chhan chu central sorkarin petrol leh diesel man Rs.5 (petrol) leh Rs.10 (Diesel) a tihhniam avanga state lamin tihniam ve tura a ngen bakah state thenkhatin Rs.7-a an tih hniam entawna tih a ni. Khatih laia central sorkarin state sorkarte tihniam tura a ngenna chu CM hmasa khan zahawm tiin a tihniam ta a ni.

Tunah hian Petrol man hi Rs.99.24 ah tihsan a nih pawhin kum 2021 a petrol man tihhniam a nih hmaa kan pek thin Rs.107.12 kha Rs.7.97 in kan la pha chuang lo va. Chutiang bawkin Diesel man hi Rs.88.02 ah tih san a nih chuan kum 2021 a diesel man tihhniam a nih hmaa kan pek thin Rs.97.89 kha Rs.9.87 in kan pha ta chuang lo a ni. Petrol leh Diesel man hi sang vak angin lang mah se, kum 2021 a leina atana kan lo hman thin Rs.107.12 leh Rs.97.89 nena khaikhin chuan a la hniam tho a. He thil hi a thlen theihna chhan chu tun hnaiah India in crude oil a leina rate a tihhniam vang a ni ber a. Kum 2021-a petrol leh diesel man Rs.7 laia tihhniam a nih khan lirthei chuan man leh thil phurh man a tlahniam chuang lo va. Tuna VAT kan pun leh chung pawh hian 2021-a petrol man zuk tlakhniamna Rs.101.30 aiin tuna petrol man rawn sang chho hi a hniam zawk a (Rs.2.06 in), diesel erawh, a man tihhniam a nih hnua a tlakna Rs.86.37 aiin Rs.1.65 in a to chho dawn chauh tihna a ni.

Petrol leh Diesel a VAT tihsan a nihnaah hian minister ka nih angin a mawhphurna pawh keima kuta awm a ni a. Resource Mobilisation Committee in rawtna an siam kha kan thiam ang tawk leh mipuite tana tha bera tura kan ngaih angin kan kal pui a ni.

A tawp berah chuan, Petrol leh Diesel man tla hniam zelin chhiah a tih tlem zel avang leh mipuite tana hna thawk tura sum kan mamawhna a san chhoh zel tak avangin chhiah tisang lo thei lo dinhmunah kan ding ta a. Mizoram mipuite bakah lirtheia eizawngte pawhin he kan hmalakna hi min hrethiam a, harsatna min siam sak lo hram turin ka ngen che u a. In tan kan thawk zel dawn a ni tih ka han hriattir che u a ni. Ka lawm e

PRESS STATEMENT VAT on Petrol and Diesel.pdf