4774/2025-2026

Dated Aizawl, the 11th March, 2026 : Vawiin khan North Eastern Regional Power Committee (NERPC) hnuaia Technical Coordination Committee (TCC) Meeting vawi 31-na chu KTP Youth Resource Centre, Falkland-ah NEIH a ni a. He meeting hi Er. J.H. Malsawma, Engineer-in-Chief, Power & Electric Department chuan a kaihruai.

Pi Pansngiat Sun, Chairman, TCC chuan ram mawi leh nuam tak Mizorama TCC leh NERPC meeting an nei chu lawmawm a tih thu a sawi a. Renewable energy lamah mahni kan intodelha hma kan sawn zel a pawimawh thu a sawi a. Kalkhawmte chu power sector-a kan than zel theih nan an ngaihtuahna senga, sawihona hlawkthlak tak nei turin duhsakna a hlan a ni.

Hun kaihruaitu Er. J.H. Malsawma pawhin thusawiin, Mizoram mawina an rawn hmu ve thei chu lawmawm a tih thu a sawi a. Kawlpetha hi kawng tinrenga hmasawnna atana thil pawimawh hmasa berte zinga mi a nih avangin power sector-a hma kan sawn zel nan he TCC meeting hi a pawimawh em em a ni, a ti a. Sawihona tha tak neih a nih theih nan leh North-east state-te tan hmasawnna duhawm tak a thlen ngei theih nan duhsakna a hlan a ni.

Vawin thutkhawmah hian NER member-te power sector-a tunlai thamna leh khawl chhuakthar lama zirna neih tur chungchangte, chatlak lova kawlphetha kan neih theih dan turte, North Eastern Region-a Power lama thawhhona tha zawk neih dan turte, harsatna kan tawh mek leh a sutkian dan turte sawi ho a ni.

TCC meeting hi India North East region-a power sector-a organization hrang hrangte inkawmkhawmna niin, North-East region-a power sector kalphung siamthatna leh grid operation ṭha zawk siam nan hma lakna pawimawh tak a ni. Kumin NERPC leh TCC meeting hi Power & Electricity Department, Government of Mizoram in a thleng a. NE State hrang hrang atangin Utilities/Company/organization 25 he an tel a ni.

Naktuk March ni 12, 2026 hian North Eastern Region Power Committee (NERPC) chu YRC-ah an thukhawm dawn a. He thutkhawmah hian NE State Power Minister zawng zawng tel tura beisei an nih laiin Assembly Session neih mekte avangin, member rawn kal thei lo tur an awm nual a ni.