Vawiin khan Norway company pakhat ‘FiberStrength’ Chairman Arne E Svinningenin Chief Minister Pu Lal Thanhawla chu CMO Cabinet room-ah kawmin, powerpoint presentation hmangin rua leh mau hman tangkai theih dan chungchang a sawipui a. Rua leh mau atanga siam oriented straw board hi hmanna tam tak a awm thu sawiin, chu chu hman tangkai chuan sum tam tak hai luh theihna anih thu a sawi a ni.

Khawvel pumpuiah thingkung a tlem tial tial avangin rua leh mau tangkai zawka hman khawvelin a buaipui mek thute an sawiho a. Norwegian mithiam hian hmalak dan tur Chief Minister hi a sawipui a ni. Mau leh rua hmun atan ram zau tak siam a tul thute sawi bawkin, China in helama hlawkna a hmuh nasatzia te hi zir tham a awm a ni a ti a. India ramah NE States te hi rua leh mau tamna ber, 66% lai a awm avangin state hrang hrangte hmalak ran a tul thute a sawipui bawk a. Mizoram bikah erawh chuan Fiber Reduction Factory Unit din phawt a tul hmasak tur thu Norwegian Company Chairman hian a sawi bawk a ni.

Chief Minister hi Pu Lalram Thanga, Principal Secretary to Chief Minister leh Pu P.L.Thanga, Mizoram State Planning Board Member Secretary ten an tawiawm a ni.