2930/2024-2025

Aizawl, the 12^th November 2024: Vawiin chawhma khan Assembly Annexe Conference Hall-ah nileng awh, Table Top Exercise, Stage 2 of State Level Mock Exercise on Flood and Landslide Disaster in Mizoram chu National Disaster Management Authority (NDMA), Ministry of Home Affairs leh State Disaster Management Authority, Mizoram te tangkawp chuan an buatsaih a. Table Top Exercise hi November 14 a neih tur state level Mock Exercise on Flood and Disaster in Mizoram atana lo inpuahchah lawkna a ni.

He hun hi Aizawlah chuan State Level leh Aizawl District Disaster Management Authority kaihruaina hnuaia Incident Response Team te leh a kaihhnawih local council te leh NGO te nen Assembly Annexe Conference Hall-ah hman ho a ni a. District danga DDMA leh IRT te chuan Video Conference kaltlangin an rawn zawm a ni. 

Brig. Ravinder Gurung (Retd.), Sr. Consultant, (ME&IRS),  NDMA, Govt. of India chuan inlawmna thu sawiin Table Top Exercise hi tan a ni a. Pi K Lalrinzuali, Secretary, Disaster Management and  Rehabilitation Dept., Govt. of Mizoram hnen atangin Table Top Exercise hman a nih chhan te, November 14 a Mizoram pum huapa state level mock exercise kan neih tur a tul em em nachhan leh pawimawhna te ngaihthlak a ni a. Hemi hnu hian Lt. General Syed Ata Hasnain, PSVM, AVSM, SM, VSM  (Retd.), Member, NDMA, Government of India hnen atangin thuchah tawi ngaihthlak chhunzawm leh a ni. 

Table Top Exercise puala thuchah tawi ngaihthlak a nih hnu hian presentation pawimawh tak tak thlirho a ni. Directorate of Disaster Management & Rehabilitation atangin Mizoram State Disaster Management Plan,   MIRSAC, DST, Government  of Mizoram atangin Flood vulnerability leh Directorate of Geology and Mining, GoM atangin Landslide vulnerability te presentation felfai tak hmangin thlirho a ni a. AIG (Ops), Mizoram Police Hqrs., GoM (i/c SDRF) leh Er Lalhriatpuia, Aizawl DDMA ten resources available and mobilisation plan an neih chungchang an sawi fiah leh bawk a. Presentation hnuhnung berah Lunglei Fire Station ten Kum hmasa lama Kangmei chhuak liantham tak, hlawhtling taka an thelh mih dan thlirho a ni. 

Chawhnu lamah hun thenhnihna leh Table Top Exercise chu Exercise Coordinator Brig. Ravinder Gurung (Retd.), Sr. Consultant, (ME&IRS), NDMA kaihhruaiin chipchiar taka neih a ni a. He hunah hian Coordinator hian DDMA, IRT member te leh Stakeholder te chu chhiatna lo thleng thei thil hrang hrang an hmachhawn dan tur te zawtin an inpuahchahna chungchang te a sawi pui a ni.

Huntawp khar nan November 14 a state level Mock Exercise neih turah IRT leh Stakeholder te thawhho dan tur chungchang Exercise  Coordinator hovin  neih a ni bawk.

State Level Mock Excercise ah hi District tinah November 14 hian huaihawt a ni dawn a. He hunah hian Tuilian, Leimin leh Kangmei chhuak avanga Chhiatrupna thleng thulha chet lak dan tur a takin kalpui a ni dawn a. Aizawlah chuan Mock Exercise atan hian Tuilian, Leimin leh Kangmei chhuak kaihhnawih Chhiatrupna thlenna tur hi hmun thum - Sairang, Seventh Day Hospital leh Vaivakawn te ruahman a ni a. Siren te tih rik a ni dawn a, Electric Current pawh off thut niin Kawng block leh thil dang thleng thei te pawh a taka entir a ni dawn a ni.