2929/2024-2025

Dated Serchhip, the 12th November, 2024: Vawiin khan Chief Minister Pu Lalduhoma chuan a bial, Serchhip khawpui kianga En tlang ngaw, Nagar Van Yojana (Urban Forest) scheme Rs. 132 Lakh senga chei chu a hawng. Pu Lalthansanga, Forest Minister chu khualzahawm a ni.

Thu a sawinaah Chief Minister chuan, he tlang leh a chhehvel ram hi Mizoram laili lo luah hmasatute hmunhma langsar a ni a. Bengkhuaia awp thin ram a nih vang ngawt pawh hian humhalh a phu a ni.

India State of Forest Report (IFSR) - 2021 in a tarlan danin, Mizoram pum zau zawng atanga 84.53% chu ramngaw (Green cover) in a la tuam a. Hei hian ramngaw nei tha state anga min lan tir laiin, ramngaw tha (Very Dense Forest) erawh chu 0.74% chauh kan nei tawh. North Eastern States zawng zawng zingah ramngaw tha (Very Dense Forest) nei tlem ber kan ni mek. Rambua (Open Forest) kan tih ang hi kan ngah em em ringawt mai a ni. Kan ram zau zawng a tanga chhutin 56.68% lai hi rambua a ni. Kan ramngaw tha (Virgin forest/Very Dense Forest) chu Protected Areas (National Parks & Wildlife Sanctuaries) ah bak kan nei tawh lo tluk a ni.

Serchhip khawtlangin sawrkar chet hma kum tam tak atangin ramngaw humhalh hna in lo thawk tawh a. In chhuanawm ka ti a, kan lawm a ni. Ramngaw nei tha ram leh khua apiang hi kan la awt dawn a. Vawiina bultantute hi mifing, hmatlir nei tha khua in ni. Kum tinin lo leh huan hal la bansan thei chiah lo mah ila, hmasawnna hnate pawh thawk zel chungin; kan ram hmun tam tak hi tha taka humhalh kan tum dawn a. Environmental Balance (zero emission) nei turin kal zel kan tum ang, tiin ramngaw humhalh that a tulzia a tarlang.

En tlang ngawah hian ram sa leh savate han tla dul dul mai se, a en turin kan pan ruih ruih mai ang. He hmalakna hian midangte tiharh se, a lo kalpui mek tawhte tiphur zual se, ram hmangaihna meichher hi Serchhip atang hian nasa takin lo eng chhuak thar se a duhawm hle a ni, a ti.

Khualzahawm Pu Lalthansanga, Minister EF & CC pawhin thusawiin, Serchhip YMA te nena phei khai rual taka Nagar Van kan kalpui thei hi kan lawm a, vawiina kan hmalakna chin hi a thawhkhatna chauh a la ni a, a thawh hnihna a lokal leh ang a, kan la chhunzawm zel dawn a ni, a ti a. Ram leh hnam humhalh a tulzia leh chumi kawnga sawrkar hmalakna te a tarlang bawk.

Nagar Van Yojana hi sawrkar laipuiin khaw chhunga ramngaw siam beihpui a thlakna a ni a. Kum 2020 June ni 5, World Environment Day ni tak khan a puang a, a thawh khatnaah, “Kum nga chhungin urban forest 200 siam ni se, sum leh pai hi CAMPA (Compensatory Afforestation Fund Management and Planning Authority) CAF (Compensatory Afforestation Fund) atanga pek ni se, Pune khawpui chhunga Warje Urban Forest chu role model-ah hmangin khawpui dangah hmalak ve ni se”, a ti a. Vawiina kan hawn Entlang pawh hi chu hmalakna hmanga kalpui chu a ni.

Pu R. Lalnungrenga, DFO, Thenzawl chuan technical report a pe a. Kum 40 chuang Serchhip YMA ten an lo enkawl tawh hectare 100 a zau, En Tlang Ngaw chhungah hian Nagar Van hmangin hectare 50 huam chinah thing engemaw zat phun belh niin Fur ruahtui luangral tur khawlna tur hmun ruk (6) siam a ni a, check dam engemawzat siam niin, ke-a ramngaw fanna tur kawng te, Interpretation Hall te pawh siam a ni. Tlang chhipa Dil awmsa chu cheibawlin a chungah Lei mawi tak dawh a nih bakah hmun dang pakhat-ah Hruizen Lei dawh a ni bawk. Fencing te leh Gate pui pawh tha taka siam niin Building awmsa te pawh chei thar a ni.

Inkhawm hi Pi Kamal Preet, Addl. PCCF in a kaihruai a, Rev. Rolungmuana Zadeng in hunserh hmangin, Sub Hqtrs YMA President Pu Kawlthuama leh midangten thusawina hun an hmang bawk. Pu Laltlanhlua Zathang, Conservator of Forest chuan lawmthu sawiin hun a khar a ni.