Mizoram Chief Minister Pu Lal Thanhawla thahnemngaihna avanga kumin November thla chhung ngeia Power Grid Corporation of India Ltd (PGCIL ) ten internet inthlunzawmna chak leh rintlak a awm theih nan Optic Fiber Cable hmanga Kumarghat, Tripura leh Mizoram an thlunzawm tur hi hmasawnna lawmawm tak a ni, Information and Communication Technology Minister Pu Zodintluanga’n a ti a, hei hian IT hmanga khawvel nena kan inthlun zawmna (connectivity) a harsatna kan tawh thin chu thui tak a chingfel ngei ang, a ti. He thu hi vawiina ICT Department leh NASSCOM tangkawpin National Workshop on e-Governance, ni 18th June 2012 a neih tur leh State Wide Area Network (SWAN) 19th June 2012 a Chief Minister hawn tur chungchang thlirlawkna meeting-ah a sawi a. Minister chuan RelTel company ten Mizoram chhunga District leh Block zawng zawngah te Optic Fiber thlun a nih theihnan a tul ang te sorkar laipui chuan a tifel tawh a, a thlunna hmun tur te enthlithlai (survey) a ni tawh, tih a sawi lang bawk.
Citizen Centric e-Government tih thupui hmangin Information and Communication Technology Department chuan NASSCOM nena tangkawpin June ni 18 hian Aijal Club-ah State Consultation Workshop an buatsaih dawn a. He programme pawimawh tak neih tur thlirlawk hian vawiin khan ICT Minister Pu Zodintluanga hovin a Office chamber-ah Mizoram sorkar department hrang hrang leh a kaihhnawih agency hotute an thukhawm.
Minister Pu Zodintluanga chuan, tunlai khawvelah information technology chak taka a than mek lai hian Mizoramah pawh e-governance chak taka kalpui chu sorkar department hrang hrang te tan thil pawimawh leh tul tak a ni tawh a, chuvangin he workshop neih tur hi tangkai taka department-ten an chhawr theihnan lo inbuatsaih turin a chah a ni.
Ruahman chhin ang chuan he hun hmang tur hian sorkar laipui Department of Electronics & Information Technology (DeitY) Joint Secretary Dr. Rajendra Kumar; National E-Governance Division (NeGD), DeitY Director Pu V. Sivasubramaniam leh mi pawimawh dang te an lokal dawn a ni.
Mizoram district leh khaw dang hrang hrang nena inthlunzawmna State Wide Area Network (SWAN) pawh Pu Lal Thanhawla, Chief Minister-in June ni 19-ah a hawng dawn bawk a. Minister Zodintluanga chuan SWAN hawn a nih hunah chuan Mizoram hmun hrang hranga awmte chuan information technology hmangin kan thil hriat duh hrang hrang te kan hriain kan inthawn thei tawh dawn a, hengte hi sorkar hnathawhna leh mipui rawngbawlna atan tangkai tak a ni dawn a ni, a ti. SWAN hawn tur chungchang thil pawimawh leh programme kimchang tur te chu vawiin meeting-ah hian rel a ni bawk.
