2652/2024-2025

Dated Aizawl: The 23rd October, 2024: Pi Lalrinpuii, Minister, Social Welfare, Tribal Affairs, Women & Child Development Department changtu chuan NSAP-PPS on-boarding programme hi khuallian niin a hmanpui.

He hun hi Pi Caroline Hmingthanzuali, Deputy Director, Social Welfare & Tribal Affairs chuan kaihruaiin, Pi Zomuanpuii, Assistant Director, Social Welfare & Tribal Affairs, NSAP Nodal Officer ni bawk chuan Keynote Address pe in NSAP Mizoram hmalak tawhna hrang hrang a sawi bakah Sorkar kum kal mek a hmalak tawhna te leh hmachhawp pawimawh tak tak te a sawi bawk.

NSAP-PPS on-boarding Programme-ah hian Ministry of Rural Development lam atangin Pu Selveswaran M, Senior Director (IT) and HoD, NIC-DoRD; Pu Sanjay joshi, Director (IT), NIC-DoRD; Pu Anil Kumar KC, Under Secretary, NSAP, DoRD; Pu Ankit Sharma, ASO, NSAP, DoRD leh Pu Sudhir Kumar, Resource Person, NSAP, NIC-DoRD te an rawn kal a ni. NSAP hnuaia chhawmdawlna dawng thei tur hian India khua leh tui tupawh Sorkar-in Below Poverty Line (BPL) chhungkua an ni ngei a ni tih a hriatpui te nih a ngai a. NSAP hnuai a Pension-te hi Central Sorkar hmalakna bakah Mizoram Sorkar hmalakna tangkawp a chhawmdawlna pek a ni a, Mizoram Sorkar-in kumin Sorkar kum thar 2024-2025 atangin NSAP pawimawh zia hria in tunhma a chhawmdawlna Rs. 100 ni thin chu Rs. 1000 ah a rawn tisang bawk. Mizoram Sorkar in chhawmdawlna a pek bik Rs. 1000 hi pension dawngtu te hnenah Kum 2024-2025 atan hian April ayanga September, 2024 thleng semchhuah tawh a ni bawk.

He programme hi Mizo ten kan hriat lar em em Tar Pension kan tih mai Old Age Pension leh a kaihhnawih Pension hrang hrang khaikhawmtu National Social Assistance Programme (NSAP) hnuai a awm scheme \hensawm Pali (4) heng- Indira Gandhi National Old Age Pension Scheme (IGNOAPS), Indira Gandhi National Widow Pension Scheme (IGNWPS), Indira Gandhi National Disability Pension Scheme (IGNDPS) leh National Family Benefit Scheme (NFBS) ah te chhawmdawlna dawngtu ten anmahni Bank/Postal Account ah ngei Direct Benefit Transfer (DBT) kaltlang a tanpuina an dawn theihna tur a Ministry hmalakna a ni.

NSAP hi Mizoram Sorkar hnuaiah Social Welfare & Tribal Affairs Department hi Nodal Department niin Ministry of Rural Development, Govt of India hmalakna pawimawh leh thleng thui ber te zing a mi a ni mek a.

Kum 1995 August ni 15-a Central Sorkar in NSAP a din tan atangin Mizoram ah pawh hlawhtling taka kalpui mek a ni. IGNOAPS hnuaiah hian Mizoram bikah tunah hian chhawmdawlna dawng Tar Pension latu mi 25,213 an awm mek a, Widow Pension hnuaiah chhawmdawlna dawngtu 2310 awm leh in Rualbanlote Pension kan tih mai Indira Gandhi National Disability Pension dawng mek tu mi 742 an awm mek bawk. Chhungkaw chawmtu ber boral ta chhungte chhawmdawlna National Family Benefit Scheme (NFBS) ah hian kum tin chhungkua 197 te hnenah tum khat chhawmdawlna pek thin a ni. IGNOAPS hnuaiah hian BPL chhungkua ami kum lam a upa te hnenah pension pek thin a ni a. Kum 60-79 inkarte hnenah thlatin pension pawisa Rs. 200 (Central) leh Rs. 1000 (State) a vaiin Rs. 1200 pek \hin a ni a. Tin, kum 80 chunglamte hnenah Rs. 500 (Central) leh Rs 1000 (State), a vaiin Rs. 1500 thla tin pek thin a ni bawk. IGNWPS hnuaiah Hmeithai (BPL chhungkua) kum 40-79 inkar te hnenah pension Central Rs. 300 leh State Sorkar tum Rs. 1000, a vaiin Rs. 1300 thla tin pek thin a ni bawk. Kum 80 chunglamte hnenah Rs. 500 (Central) leh Rs 1000 (State), a vaiin Rs. 1500 thla tin pek thin a ni bawk. IGNDPS hnuaiah Rualbanlo (BPL chhungkua) kum 18-79 inkarte hnenah pension Rs. 300 (Central) leh Rs. 1000 (State tum) a vaiin Rs. 1300 thlatin pek thin a ni a. Kum 80 chunglamte hnenah Rs. 500 (Central) leh Rs 1000 (State), a vaiin Rs. 1500 thla tin pek thin a ni bawk. NFBS hnuaiah hian chhungkaw eizawngtu ber a boralin, BPL chhungkua te hnenah vawikhat atan tanpuina Rs. 20,000/- pek thin a ni a. Chhawmdawlna hi chenpui la damte hnenah, khawtlang hruaitute nena tangkawpin chhungkaw lu ber leh eizawngtu ber ani tih hriatpui hnuah pek thin a ni. Chhungkuaa eizawngtu ber chu hmeichhia emaw mipa emaw pawh nise kum 18 leh kum 60 inkar a nih laia a boral anih chuan chhawmdawlna hi a pek theih a ni.

NSAP-PPS Training neih chhunzawm niin District hrang hrang a District Social Welfare Officer leh Staff te bakah Social Welfare & Tribal Affairs Directorate hnuaia NSAP bik kaihhnawih changtu Staff te hnenah Ministry of Rural Development atanga Resource Person lo kal in Training a pe a, mi 25 in Training hlawkthlak tak an nei thei a ni. Tun Sorkar kum kal mek atanga tan in chhawmdawlna dawngtu (Beneficiaries) ten anmahni account (DBT) ah a hun taka chhawmdawlna an dawn theih nan chak taka hmalak nghal tum a ni bawk.