National Service Scheme (NSS) State Level Advisory Committee chu vawiin chawhnu dar 1:00 khan Pu R.Lalvena, IAS, Special Secretary, Sports & Youth Services hovin ama office chamber ah an thukhawm a, kum kalta 2011-2012 chhunga NSS hmalakna te thlirletin kum 2012-2013 chhunga hmalakna tur ruahmanna te an sawiho.

NSS thiltum ber chu khawtlang rawngbawlna hmanga mihring puitling chherchhuah a ni a, chumi tihhlawhtlin nan chuan programme hrang hrang te an huaihawt thin a ni. College leh Higher Secondary School atangin volunteer an inla thin a, khawtlang hamthatna tur hna chi hrang hrang te hlawh nei lovin an thawk thin a ni. Tunah hian Mizoram pumah NSS volunteer 23,100 an awm a, College 25 ah NSS Unit 95 awmin Higher Secondar School 43 ah Unit 136 an awm mek bawk. NSS hian mi inphal leh tlawmngai te hnen atanga thawhlawm an hmuh atangin vantlang zunin te, tuikhur te, tuizem te, bazar leh khawtlang mamawh thil dangte an siam thin a, HIV/AIDS, Malaria, ruihhlo etc thupui te hmangin inzirtirna (awareness campaign) te an huaihawt thin bawk. Khawtlang tana an hmalakna langsar tak pakhat chu thisen pek a ni a, kum kalta chhung khan thisen unit 3140 lai an pe a ni. Ram chhung leh rampawn ah National Integration Camp leh Adventure Programme ah te volunteer an intir thin a, Ministry of Youth Affairs & Sports, Government of India chuan khawtlang tana hnathawh that avangin Indira Gandhi NSS Award 2010-2011 chu pawisa fai Rs 1,00,000 /- nen SLO NSS (Cell) Mizoram hnenah a lo hlan tawh a ni.

Pu Sunil Kumar Basumatary, Youth Officer, NSS Regional Centre, Guwahati atanga Meeting-a rawn tel chuan khawtlang tana NSS Mizoram hmalakna te chhuanawm tiin sorkar laipui pawhin chu chu hriatpuiin ram pum huap lawmman pawh a dawng pha hial a ni, a ti. India ram pumah NSS volunteer 32,00,000 zet an awm a, hmarchhak state te pawhin an thawh hlawk em em a ni, a ti bawk.