NSS State Level Advisory Committee Meeting vawi 12-na chu an Chairman Pu Zodintluanga, Sports & Youth Services Minister hovin a pisa-ah vawiin khan neih a ni. Meeting-ah hian Parliamentary Secretary Pu Hmingdailova Khiangte pawh tel a ni.

Meeting kaihruaitu Sports Minister Pu Zodintluanga chuan NSS hmalakna hmanga thil tangkai tak tak siam te chu, a siam ah duh tawk mai lova, a enkawl zui kawngah pawh tan lak a pawimawh thu tarlangin, NSS thil tum chu mi tam zawkin an hriatchian a beisei thu a sawi a ni.

Meeting-ah hian kum kalta 2013-2014 chhunga NSS hnathawh chi hrang hrang thlirlet a ni a, 2014-2015 chhunga an hmachhawp te, Mass Plantation Programme neih tur chungchang leh thil pawimawh dangte sawiho a ni.

2013-2014 chhung khan NSS volunteer mipa 13611, hmeichhia 9489, an vaiin 23100 an awm a. Mizoram hmun hrang hranga College 25-ah NSS Unit 87 awmin, Higher Secondary School 51-ah NSS Unit 144 a awm bawk. NSS unit hrang hrangte hian zun in, vantlang tuisemna hmun, chawlhbuk, vantlang inthiarna leh vantlang mamawh thil dang engemawzat an siam bakah thing phun hna, vantlang hmun tihfai hna, thisen pek, zeng hri danna pek leh mipui hrilh bengvarna, awareness campaign vawi duai lo 213-2014 chhung hian buatsaih bawk.

NSS hmalakna hnuaiah nikum December 2013 khan Aizawlah hmeichhe tan mahni invenhimna, self-defence class buatsaih a ni a. Kumin February ni 3-7 chhung khan Mizoram University-ah NSS North East Youth Festival hlawhtling taka neih a ni bawk.