National Sample Survey Office (NSSO) hnuaia North Eastern States Monitoring Committee chuan vawiin khan Hotel Floria Conference Hallah meeting an nei.

He meeting, Mizoramin a thlen vawi khatna leh a hmasa ber hi India a NSSO hotu ber Pu D.P.Mondala kaihhruaina hnuaia neih a ni a, NSS Round 75-na kalpui mek dinhmun thlir hoin sum leh pei bakah tul dangte an sawiho a ni.

Monitoring Committee of North Eastern States hi NSSO, Field Operation Division, North East Zone, Guwahati hnuaia Committee sang, Hmarchhak chhunga rampum dinhmun hrang hrang hriatna tura Socio-Economic Survey neih thin hmalakna viltu leh endiktu a ni.

Monitoring Committee ah hian hmarchhak State tina Economic & Statistic department Director te chu member an nih angin meetingah hian an tel kim hle a, an ni bakah NSSO Regional Office hrang hrang atangte leh Data Processing Division, Kolkata leh Field Operation Headquarters, New Delhi atang te in an tel a ni.

NSSO hi kum 1950 khan din niin, rampumah socio-Economic Survey an nei thin a, tunah hian round 75-na an kalpui mek a ni. Mizoramah chuan kum 1977-78 ah bul tanin tunah hian round 32-na Directorate of Economics & Statistics in a kalpui ve mek a ni.