Vawiin khan District Fisheries Development Office Conference Hall, Kolasib ah Sangha khawitu (Fish Farmers) te tan Sangha chi siam dan leh Sangha dil enkawl leh Kaikuang chi siam dan, a chaw pek leh enkawl (Prawn culture) chungchangah Training buatsaih a ni.

He Training hi National Fisheries Development Board (NFDB), Hyderabad bultuma buatsaih niin Pi C. Lalparmawii, District Fisheries Development Officer, Kolasib in a kaihruai a. Pi Lalparmawii chuan "Fisheries" tih hian Sangha chauh ni  lovin Lui sa chi hrang hrang a huam a ni a ti a, Kolasib District chu Sangha leh Lui sa thar chhuahna kawngah theihna (Potential) tam tak a neih thu a sawi a, Sangha bikah Mizorama District thar chhuak tam ber an nih thu tarlangin Kaikuang ah pawh tih takzeta hma an lak chuan theihna tam tak a awm thu sawi bawkin he huna kalkhawm Fish farmers te hnenah Training chu hlawkpui ngei turin duhsakna a hlan bawk a ni.

Kaikuang chi siam, a chaw pek leh enkawl chungchangah Pu PL Lalrinsanga, Scientist ICAR Kolasib chuan kalkhawm te hnenah zirtirna a pe a, Sangha enkawl leh Sangha Dil enkawl chungchangah "Management of Soil and Water and Fish Diseases for Sustainable Aquaculture" tih thupui hmangin Pu Zohmingthanga Fisheries Extension Officer, Kolasib chuan zirtirna a pe bawk a. Hemi bakah hian kalkhawm te hnen atanga hriat belh duh nei te tan zawhna leh chhanna hun hman niin sawihona hun hman bawk a ni a, he hunah hian Sangha khawitu mi 50 an kalkhawm a ni.