Vawiin chawhma kha Transport Minister Pu John Rotluangliana chuan Aizawl City Bus Owners' Association (ACBOA) khawmpui lian vawi 45-na chu Kulikawn YMA Hall-ah a hman pui. 

ACBOA khawmpui hmanpuitu Transport Minister Pu John Rotluangliana chuan Aizawl khawpui chhunga Bus tlan chu Aizawl khawpui cheitu anih bakah  Mizo hnam darthlalang a nihna chen a awm a vangin a neitute pawhin Bus service tir chungchangah  an hamthatna zawn ngawt thlir loa kan vai atana thatna tur an hmuhthiam ve a ngai a ni a ti a. City Bus neitute chu Bus fare chungchangah mipui sum dinhmun ngaichang phawt tur leh tihdanglam tum rih lo turin a ngen a ni. 

 Khawpui chhunga lirthei tawt lutuk tiziaawm turin lirtheite chu  a chak tha in  a chhiat avanga traffic jam siam thei tur chi a nih a rem loh tih a sawi a. Aizawl khawpui bikah Taxi Permit pek a ni tawh lo a. MZ09 Registration hmangin DTO(Rural) kaltlang erawh chuan Aizawl pawn lam Aizawl District chhunga tlan turin pek a ni zawk tih a tarlang. Transport Minister chuan 2 wheeler taxi pawh a pun chak em avang leh Traffic a tih tawt belhchhah loh nan license pek theih chin siam a ni a ti a; atam lama tiam chin 500 pek chhuah tawh a nih tawh thu  a sawi a . 2-wheeler Taxi License chu pek chhuah a ni tawh dawn loa; license neitu zinga huntiam chhunga lirthei nei hmanlote an awm a nih erawh chuan chung mite chanai erawh a dil theih chauh tawh ang a ti. Auto Rickshaw,  Aizawl khaw chhehvel a service tir pawh a pun chak em avangin license pek chhuah theih chin a thleng leh tep tawh tih sawiin khawpui chhunga lirthei tawt lutuk tih tlem nan sawrkar a khauh thu a sawi a. MV Act chu dan a nih angin thuneitute tan pawh siam danglam a nih loh chuan palzut theih a ni lo a ti.  

Transport Minister Pu John Rotluangliana chuan sawrkarin City Bus kum 10 tlan tawhte thlak tura thupek sawrkarin a chhuah chu Bus neitute thurawn anga siam a ni a; an duh leh tak loh avangin an thurawn ang bawkin kum 15-ah pawhsei a ni tih a sawi a. Khawpui chhunga tlan City Bus te chu Fitness-ah MVI ten la tlan thei tura tha tawk an tih phawt chuan kum 15 tlan tawh pawh an tlan chhunzawm sawrkar chuan a remti a, MVI Fitness test erawh paltlang a ngaidawn a ni a ti. Transport Minister chuan ACBOA ngenna - Mandatory Replacement of Vehicle/Bus chu kum 15 atanga kum 20 a pawhsei ni rawh se tih chungchang chu Chief Minister a rawn tawh thu a sawi a. Mizoram sawrkar chuan   Central Vehicle Act chu a hman tho angin Central Sawrkarin Replacement chu  kum 20 ah a pawtsei  a nih phawt  chuan chutiang anga kal ve chu remtih a ni ang a ti a. City Bus  kum 15 tlantir tawh neitute a thlakna tur sum nei si te chu lirthei mawihnai zawka Aizawl khawpui chei an mawhphurhna a ngaia an Bus hlui tawhte thlak turin a chah thung a ni. 

ACBOA khawmpui vawi 45-na programme hi hun 3-ah then a ni a. Session hmasa ber hi ACBOA President Pu Malsawmtluangan a kaihruaia. General Secretary Report  Pu P.Sanghmigthaga hnen atang ngaihthlah a ni. Session hnihnaah General Election neih a ni a; Session thumnaah rorel inkhawm neih niin ACBOA hmachhawp hrang hrang te leh awtna lutte ngaihtuahho a ni. ACBOA hi kum 1973 khan din a ni a, report a tarlan a nih dan chuan tun dinhmunah Aizawl khawpui chhungah ACBOA City Bus 262 a tlan mek a, office staff 16 an chhawr mek a ni.