Vawiin khan National Students Union of India (NSUI) chuan tun hnaia Mizoram Board of School Education Result chhuaka pawl 12 leh pawl 10-a topper te hnenah lawmpuina an hlan a. Lal Thanhawla Auditorium-a inkhawm buatsaihah hian Education Minister Pu H.Rohluna chu khuallian a ni.
Pu H.Rohluna chuan sawrkarin zirna a ngai pawimawh a, zirna in hma a sawn theih nan theihtawpin tan a la tih sawiin zirlaiten tun aia tha leh zual zawk result an nei thei a ni, a ti a. Hmeichhia ten zirna kawng hrang hrangah nasa taka hma an sawn laiin mipa lam erawh an tlahniam niin a lang a, nasa lehzuala tan an lak a ngai tiin Minister chuan mipate an tan loh chuan Mizo khawtlang nunah a tha lo zawngin nghawng a neih a hlauhawm, a ti a. Mahni leh chhungkaw tan chauh ni lo, ram tana theihtawp chhuaha lehkha zir turin zirlaite a fuih a, kan rama sawrkar hnalian Mizoten an chelh zel theihna turin zirlaite tang sauh sauh turin a chah a ni. Sawrkarin theihtawp a chhuah lai hian zirlai, zirtirtute leh nu leh pate pawhin theihtawpa tan an lak a ngai a ni, Education Minister chuan a ti bawk.
Topper-te hnenah hian Minister Pu H.Rohluna hian lawmpuina thuziak leh laptop a pe theuh a. Zirlai topper nei thei school-te hnenah lawmpuina citation an hlan theuh bawk a ni.
Programme hi NSUI (Mizoram) Vice President Pu David Lalmuanpuia’n a kaihruai a. NSUI President Pu Lalhmachhuana bakah zirlai nu leh pa leh School Principal ten thu an sawi a ni.
