Vawiin hian DC Conference Hall ah Lawngtlai District atanga National Urban Livelihood Missions hnuaia Employment Through Skill Training and Placement Programme atana training tura thlan hmasak ber te tan Counseling neih a ni a, training dan kalphung leh a thiltumte an inhrilhfiah.

Lawngtlai District a training tura thlan hmasak berte Counseling programme kaihruaitu, NULM Lawngtlai District Project Officer, Pu Lallawmawma, MCS, SDO Sadaar ni bawk chuan, he skill training naah hian zir tur thlan tur (trade) a tam em em a, vawiina training tura thlan chhuah hmasa berte zinga la tello (waiting list a awm te)te pawh a thawh hnihnaah koh an ni ang. Chutiang zelin training duh apiangte tan kawng hawn kan tum dawn a ni, a ti. Amaherawh chu trade pakhatah diltu an tam lutuk chuan training hun a ti sei thei dawn a ni, a ti bawk.

Dr. Keny Vanlalhriatpuia, Manager, Skill & Micro-enterprise, NULM pawhin thu sawiin training tura thlan chhuahte chu rilru nghet leh tumruh taka bei turin a fuih a, sawrkar in a thlawn veka thiamna leh thawhna tur pek che u a tum a, chu chu a dawngtu ten lo bawhchhe lo ila, chawikan tlak khua leh tui mih i tum theuh ang u, a ti bawk.

Khawpuia cheng mi harsa zawkte hnena thiamna pek leh an hnathawhna zawn sakna Programme hi 12th Five Year Plan in National Urban Livelihood Missions hna atana a ruahman pakhat a ni a, chumi atan chuan National Skill Development Corporation (NSDC), Delhi te nen thawh dunna siamin anni hmalakna in Mizoramah pawh Training hi neih tur a ni. Training tura thlante chuan kum khat chhung training an nei anga, NSDC ten an thiamna an endik (Exam) leh vek anga, chhawr tlaka ngaihte chu an hnathawh tur an zawn sak nghal dawn a ni.

Lawngtlai District atanga diltute zingah hian puanthui zir thlang an tam ber rih a, trade dang Motor Driving, Alluminium Frame Construction, Automobiles repairing, Candle Making, Carpentry & Woodcraft, Computer Hard & Software, Mobile Repairing, Mushroom Cultivation, Steel Fabrication leh Videography dilte pawh an awm bawk.