Association for Environmental Preservation (ASEP) chuan kum tina a hman thin angin General Assembly vawi 7-na ‘Nungcha Hmangaihtute Inkhawmpui’ tia vuah chu vawiin khan Agriculture Conference Hall-ah a hmang.

Inkhawmpui hman apiang hian ramngaw leh nungcha humhalhna kawnga thawk thate hnenah ‘ASEP Nopui’ hlan thin a ni a. Kum 2011 atan chuan Chanmari West YMA Branch te hnenah ASEP chawimawina sang ber chu hlan a ni. Chanmari West YMA Branch te hian an ram chhunga nungcha leh ramngaw awm ang angte tha taka humhalhin, Mizoram nungcha hmuh tur vang tawh tak tak te pawh an ram chhungah hmuh tur an la awm a ni.

Vawiin ASEP Inkhawmpui hian Resolution 5 an pass a, chungte chu - Dan lova thing leh mau tawlh rukna kawngah sorkarin khauh zawkin hma la se; Phalna nei lova silai te hian nungcha tam tak a tihrem avangin sorkarin khauh zawkin khuahkhirhna siam se; nungcha humhalh chungchang inhrilhhriatna hi tun aia nasa zawka hmalak ni se; ramngaw leh nungcha humhalhna kawngah dan bawhchhetute hremna kawngah sorkarin khauh takin dan kengkawh se leh nungcha khawi hi ASEP chuan tha a ti lova, sorkarin khauh zawkin dan kengkawh rawh se tih te a ni.

ASEP hi kum 2003 atanga din tan a ni a, ramngaw leh nungcha humhalhna kawngah hian hmalakna tam tak a nei tawh a. ASEP member ni kher lo Mizoram hmun hrang hranga ASEP hmalakna thlawp thintu zawng zawngte chungah lawmthu a sawi a ni. Vawiina Nungcha Hmagaihtute Inkhawmpui hi DCF(Wildlife) Pu C. Lalengliana’n a hmanpui a ni.