Nehru Yuva Kendra (NYK), Mizoram Zone hnuaia State Advisory Committee on Youth Programme chu vawiin khan an Chairman Sports & Youth Services Minister Pu Zodintluanga hovin ama office chamber-ah an thukhawm.

NYK hmachhawp Yuva Kriti Cultural Programme December 2011, National Integration Camp, January 2012-a Mizoram-in a thlen tur chungchang an sawiho a. Committee chuan heng programme pahnih te hi a thuphungin a pawm a, a buatsaihna kalpui nghal nise a ti. Vawiin Committee chuan State Youth Award 2011 sem chungchang pawh ngaihtuahin a hun atan 14th November 2011 ruatfel a ni a. He Award dawng tur District tin atanga dawng thei tur thlanna pawh kalpui mek a nih thu sawiho a ni bawk. Vawiina an sawiho langsar zingah NYK hian mipui mimir hriat a hlawh lehzual theih nana publicity lama tan lak zual a tul dan te leh Ministry of Youth Affairs bultuma NYK-in thlaite tana infiamna hrang hrang a huaihawt thin chu PYKKA nen tangduna, changtlung zawka thawhho dan dap tura Sports Minister rawtna te a ni.

Tun dinhmunah Mizoram hian Zonal Director a neih rih loh avangin Manipur leh Mizoram bialtu Pi J. Muivah pawhin a thil ngaih pawimawhte a tarlang a. Ministry of Youth Affairs leh National Skill Development Council tangkawpin thalaite hmakhawthlira Youth Employability Skill Training Project April, 2011 atang tawha rampum huapa an kalpui tawh chu Mizoram Zone pawhin a chhawr tangkai ve theih dante a sawi a. Committee kaihruaitu Pu Zodintluanga pawhin he thil tha tak hi Mizote tan thil chhenfakawm a nih a beisei thu leh Mizo thalaite rilru sukthlek mil zawnga training kalpui erawh a pawimawh turzia a hrilh a ni.