N.Vanlaiphai damdawiin PHC kum 100 tlin lawmna Vanlaiphai Community Hall-a neih Chief Minister Pu Lal Thanhawlan a hmanpui.

Chief Minister chuan N.Vanlaiphai mipuiten an damdawiin kum 100 tlinnaah lawm nachang an hria chu Pathian duhzawng a ni tiin kum 100 Pathianin a thlenpui chu a ropui hle a ni a ti a. Lawm nachang hriat loh hi a vanduaithlak thin a ni a ti. Damdawiin kum 100 tlin lawmna ni atang hian intiamkamna leh ngaihtuahna thar nei turin mipuite chu Pu Lal Thanhawla hian a chah a, ei leh bar leh sum leh paia intodelh thei turin mahni hriselna theuh ngai pawimawha kan hriselna tichhe theitu lakah fihlim turin a chah a ni. Sorkar chuan hnam intodelh leh hnam zahawma Mizo mipuite a siam tumna kawngah an chian thu sawiin Chief Minister chuan kan arkhawthim dai mai mai lo a ni a ti.

Chief Minister chuan kan awmna theuh hi Pathianin a rawngbawl tura min dahna a ni a, chuvangin, rinawmna, taimakna, dikna nen tui taka kan thawh hi mitinte mawh a ni a ti. Chief Minister chuan Hrangturzo bial mipuiten Pi Vanlalawmpuii Chawngthu an thlan tlin thu-ah lawmthu sawiin MLA 34 zinga an farnu awmchhun tur anih avangin duat pawh a hlawh hle ang a ti.

Chief Minister hian PHC kum 100 tlin lawmna hriatrengna Souvenir a tlangzarh nghal bawk.

Khual zahawm Health Minister Pu Lal Thanzara chuan N.Vanlaiphai damdawiin in kum 100 hmel a hmu thei hi a ropui a, a khaw mipuite tawiawmna leh enkawlna vang a ni a ti a. A bul tantute leh enkawltute bakah mi thahnemngaitu zawng zawng chungah lawmthu a sawi a. Pu Lal Thanzara chuan hmun lian leh changkang zawkah doctor tha zawk leh hmanrua changkang zawk awm bawk mahse mahni khua ngeia mahni hmelhriatten min enkawl hi a hlu a, a thlakhlelhawm fo zawk a ni a ti. Hriselna hi sorkar laipui ang bawkin Mizoram Sorkar pawhin a ngaipawimawh a ni a ti a, Falkawn Referral Hospital pawh Central Sorkarin Multi-Disciplinary Center atan a thlan thu sawiin hemi atan hian cheng vaibelchhe nga a rawn pek tawh thu a sawi a. Aizawl Civil Hospital tihchangtlun nan cheng vaibelchhe 40 ruahman anih thu tarlang bawkin tunah hian a hmahruaiah cheng vaibelchhe nga a rawn pek tawh thu a sawi bawk a. Mizoram-in Medical College a neih tura lo bawhzuitu tur peng hrang hrang Sub-Committee siam anih tawh thu pawh a tarlang bawk a ni. Health Minister hian N.Vanlaiphai PHC mamawh hrang hrang an thlente chu tihpuitlin sak a tum thu a sawi bawk.

Khual zahawm dang bialtu MLA Pi Vanlalawmpuii Chawngthu pawhin thu sawiin an aiawh tura an thlang tling chu Hrangturzo bial mipuite chungah lawmthu a sawi a. Hnathawh turin a umzui nghal thu sawilang nghal bawkin mipuite tawiawmna ngen chungin theihtawpa hnathawh a tum thu a sawi bawk a ni.

PHC hi a tir chuan Dispensary anga bul tan a ni a, a building pawh British kutchhuak a la ni nghe nghe a ni. A enkawltu doctor 22 chuang an lo awm tawh bawk a ni.

Lawmna inkhawm hi VCP & Chairman, Celebration Organising Committee Pu Lalthanmawia Sailo-in a kaihruai a ni.

Inkhawm zawh hian Chief Minister Pu Lal Thanhawla chuan damdawiin bathlara kum 100 tlin hriatrengna lungphun a hawng bawk a ni.