Vawiin chawhma dar 11:00 khan Lunglei District Fire Prevention Committee & Green Mizoram Committee chu an Chairman Lunglei Bawrhsap Pu Ashish Madhaorao More, IAS kaihhruaina hnuaiah DC Conference Hall-ah neih a ni.

Lunglei DC Pu Ashish More chuan kum dang ang bawkin kuminah pawh 'Green Mizoram Day' chu state pumpuiah hman tum a nih angin, Lunglei District chhungah pawh hemi Ni hmandan tur atan ruahman a tul thu a sawi a. He Ni-ah hian sorkar department leh pawl hrang hrang ten thahnemngai taka thingphun hnatlang nei turin sawm an ni dawn a ni. Mihringte hriselna ti chhe theitu kangmei lakah hei aia tan lak hi a ngai takzet a ni tih sawiin Pu More chuan mipuite hrisel zual zel zawk theih nan thing leh mau te i humhalh zual sauh sauh ang u, a ti bawk.

Pu Lianmawia DFO, Lunglei chuan chhimlamin kuminah thal a tuar nasat avangin khua/veng tina khawtlang hruaitute hmalakna pawhin awmzia a nei tak tak thei lo tih a sawi a. VC ten anmahni huamchhungah kangmei ven chungchangah hma an la tho na in, khawkheng avangin eng a ang thei lo a; VC thenkhat chuan an area chhunga ram tikangtu an hriatchian te Dan angin an hrem a, pawisate an chawi tir bawk a ni, a ti.

Vawiin meeting-ah hian kumina kangmei venna kawnga khua titha pathum(3) thlan chhuah nghal a ni a; Pakhatna-Muallianpui, Pahnihna-Serkawn, Pathumna-Lungleng 'S' leh Consolation Prize-Lungpuitlang te thlan a ni. Heng kangmei venna kawnga titha khua pathum(3) te hi 'Green Mizoram Day' hmanna pui ber Aizawl-ah Chief Minister Pu Lal Thanhawla chuan lawmman a hlan dawn a ni.

Kumin Green Mizoram Day chu Lunglei-ah ni 11.6.2014 dar 11:00AM-ah hman leh tur a ni a, a hmun atan Pukpui Centenary Lungphun nise, Lunglei HPC Vice Chairman Pu S.Laldingliana Khuallian atan sawm nise tih meeting-ah hian an rel bawk a ni.