No.7938/2020-2021

Lunglei, 26th March, 2021: Vawiin chawhnu khan Lunglei DC Pu Kulothungan A chuan a office chamber-ah NYK hnuaia Mizoram puma Youth Club ti tha ber Thingsai North Branch YMA hnenah lawmpuina thuziak leh pawisa fai Rs 25,000 a hlan.

Lunglei DC Pu Kulothungan A chuan Thingsai North YMA te an hnathawh that avanga Mizoram mai pawh ni lo India ram puma NYK hnuaia Club 21 thlan chhuah zinga an tel thei chu lawmawm a tih thu sawiin an thawhnaah hei aia chak leh tha zawk a thawk ho zel turin a chah bawk a ni.

He hun hi Pu David Lallawmsanga UNV/DYC NYK Lunglei-in kaihruaiin NYK hmalakna hrang hrang bakah Thingsai North YMA-te hmalakna hrang hrang hengte – Covid-19 duty, mi harsa te in sak sak, faina leh hriselna kawnga hmalakna, ramngaw leh nungchate humhalhna leh an hmalakna dangte report a pe nghal bawk a ni. Youth Club hi NYK hnuaia awm niin Mizoram chhungah Branch 159 in-register awm mekin, India ram pumah hian Nuai chuang fe in-register an awm mek bawk a ni tih Pu David Lallawmsanga chuan a report.