No.7939/2020-2021

Aizawl, 26th March 2021 : Labour, Employment, Skill Development & Entrepreneurship Department buatsaih, ni thum awh ‘PUM 2021: Mizoram Innovation Fair’ Govt. ITI Complex, ITI Veng-a neih chu, LESDE Department changtu Minister Pu Lalchhandama Ralte-in a kharna hun a hmanpui a. LESDE Minister hi Dr.Vanlaltanpuia, Chairman, Mizoram Youth Commission chuan a tawiawm a ni.

Khuallian LESDE Minister Pu Lalchhandama Ralte chuan ‘PUM 2021’ chu Mizoram mipui thiamthilneite tana inphochhuahna hmun pawimawh tak a nih thu leh ramdang pawhin an siam theih chu Mizote pawhin an ti ve thei a ni a ti a. Kum dang zelah pawh buatsaih chhunzawm tlak a nih thu a sawi a ni.

‘PUM 2021: Mizoram Innovation Fair’-ah hian ITI zirlaite, zirchuak tawhte, Women’s Polytechnic zirlaite leh Mizoram hmun hranghranga thiamthilneiten an thilsiam hrang hrang an phochhuah hi tlawhtu mipuiten an hlut hle a. He Fair hi mi sangkhat chuangin tlawhin,  heng zingah hian Firm leh Company neitu engemawzatin an thilsiamte indawrna siampui tura sawmna pawh an dawng a ni.

‘PUM 2021 Fair’-ah hian a zavaiin participants 23 te’n trade 10 hmangin an inel a, heng participants 23-te hian an thilsiamchhuahte hi a hmunah an hralh nghal bawk a ni. He intihsiaknaa tel zawng zawng zingah a pumpuiah Pu Dengrikhuma, Tuithiang Veng, Aizawl-in Guitar siam hmangin Carpentry trade hnuaiah lawmman pakhatna a la a, hei hian pawisafai Rs.1,00,000/- leh trophy a keng tel a. Pahnihna Gospel Lalfakzuali, Mission Vengthlang, Aizawl chuan  Bakery & Confectionery trade hnuaiah Rs.50,000/- leh trophy a dawng a. Zochansangi, RahsiVeng, Lunglei-in Food Processing hnuaiah lawmman pathumna a dawng a, hei hianpawisafai Rs.30,000/- leh trophy a kengtel bawk a ni. Top 10-a tlingten lawmman tangkafai Rs.10,000/- leh certificate an dawng theuh bawk a ni. Heng lawmman bakah hian ‘People’s Choice Award’ siam a ni a, Zochhuanmawia, ITI Veng, Aizawl-in ‘Tank Overflow Controller’ a siam hmangin he award hi a dawng a. ITI-a zirlai mek tana siam ‘Special Award’ chu Deborah Lalnunsiami’n Bakery & Confectionery trade hmangin a dawng bawk a ni.