No.7940/2020-2021

Lawngtlai, Vau thla ni 26, 2021: Vawiin khan Nehru Yuva Kendra (NYK), Lawngtlai District buatsaihin BDO BNRGSK Hall, Lawngtlaiah ruahtui khawl pawimawhzia inzirtirna, "Catch the Rain" (Rainwater Harvesting) Motivation & Education Programme hman a ni.

He programme, Pu K. Vanhmingliana, Ex-NYV-in a kaihhruaiah hian PHED Lawngtlai Division-a Sub-Divisional Officer Er T. Mangliandinga chu Khuallian a ni a. Mihring pung zel leh tuihna tlem zelah tui mamawhna a san rualin tui thianghlim hmuh tur a vang tial tial tih sawiin, thal laia harsa taka tui ngaihtuah ngai lo turin, fur laia ruahtui khawl nachang hriat a pawimawh a ni, a ti.

PHED hnuaia Swachh Bharat Mission (Grameen) & Jal Jeevan Mission-a Lawngtlai District Coordinator Pu Benjamin Lalrinzuala'n ruahtui khawl pawimawhna leh a khawl dan tur a sawifiah a. Kal khawmte'n ruahtui khawl tura intiamna thutiam (pledge) an chham rual a. Zawhna leh chhanna leh sawi hona hun hman a ni bawk.

He hunah hian NYK Lawngtlai District buatsaih COVID Warrior lawmman sem nghal niin, lawmman dawngtu Pi Lalrintluangi hnenah Pi R. Lalrammuani, Programme Officer, National Service Scheme (NSS) chuan lawmman a hlan a. NYK Lawngtlai District hnuaia youth club tha bera thlan, Young Lai Association (YLA) Council Veng Branch hnenah Award to Outstanding Youth Club hlan niin, he Award hian pawisa fai Rs 25,000/- a keng tel a ni. "Catch the Rain" campaign puala NYK Lawngtlai District-in thu inziahsiak leh lem inziahsiak (essay & painting competition) a buatsaiha a ti tha zual thlan chhuah mi pathum ve ve hnenah thuziak (citation) leh pawisa fai hlan bawk niin, NYK Lawngtlai District-a NYV Pu Thomas Rosangzuala'n lawm thu sawiin hun a khar a ni.

NYK Lawngtlai District buatsaih thu inziahsiak (essay writing) leh lem inziahsiak (painting)-a lawmman dawngtute chu:

Essay writing-

1. C. Vanlalruati, Venghlun, Lunglei;

2. Centenary C. Lalzahawma, Vathuampui Venglai;

3. Joseph C. Lalsanglura, Bualpui 'NG'.

Painting-

1. Eris Chorky, Chandmary, Lawngtlai;

2. Hnehtulalliana Kawlni, Lawngtlai-III;

3. Daniel Lalhlimpuia, Lawngtlai-III.