Nehru Yuva Kendra (NYK) Mizoram Zone hnuaia State Advisory Committee on Youth Programme, an Chairman Sports and Youth Services Minister Pu Zodintluanga hova kar hmasa lama an thurel bawhzuina leh NYK Foundation Day pualin vawiin khan NYK Mizoram Zone State Award leh Aizawl District NYK Youth Award hlanna I&PR Auditorium-ah neih a ni a, Parliamentary Secretary Sports and Youth Services Pu S.Laldingliana’n a hmanpui.

Heng Award hlan paha thusawiin Pu S.Laldingliana chuan NYK thiltum khua leh tui tha ni tura inzirtir tih chungchangah hian Mizo thalai ten zirtur tam tak, sorkar thil mahni ta anga en thiam te; dan leh thupek kenkawh kawnga sorkar tawiawm kawngah te an nei a ni, a ti a. Inthlan nikhua a vote lei leh hralh hian sorkar tha a siam theih ngai loh avangin hei hi bansan tul a tih thu a sawi lang bawk. India ram chu hnam ze hrang hrang leh sakhaw biak hran chenna a nih avangin India Danpui pawh hnam inpumkhatna tura duan a nih thu sawi langin hemi atana thil tangkai, National Integration Camp NYK in a huaihawt thin chu Mizo thalai te tan ngei pawh thil tangkai tak a ni, a ti bawk.

Vawiin inkhawm hi NYK, Aizawl District Coordinator Pu Raj Kumar Joshi chuan a kaihruai a. 2010-11 State Youth Award dawngtu chu N.T. John, Saiha District a ni a, Certificate leh tangkafai cheng 1,5000 a dawng a. Aizawl District Youth Award dawngtu te chu mipaah Johny Ngurthansanga, Hunthar Veng niin hmeichhiaah Lalmuanpuii, Maubawk a ni. District Youth Award hian Certificate leh Rs. 5,000 a keng tel.