2746/2026-2027

Aizawl, Khuangchawi thla ni 21, 2026: October 21 hi India ram pumah "Police Commemoration Day" atan hman thin a ni a, October 21, 1959 khan DCIO Karam Singh hona hnuaia 3rd Battalion CRPF police party tlemte chuan Ladakh hmuna Hot Springs area, tuipui atanga feet 15000 - 16000-a sangah ramri venga an patrol chu Chinese sipai, ralthuam famkim leh hmanraw tha tak taka thuam te chuan lo lambunin police sawm (10) in nunna an chan a, police pasarih (7) te chu hliam tuar chunga man an ni bawk. He thil thlen hnu, 1960 kuma ‘Annual Conference of IGP of States and UT’ neih chuan October 21 chu ‘Police Commemoration Day’ atana pawm turin resolution an pass a.

Chutiang chuan kum 1960 atang khan October 21 hi kum tin Police Commemoration Day atan hman thin niin, State khawpui leh District Headquarters tinah India ram humhalhna kawnga inpekna sang ber, mahni nunna hlantu police martar huaisente chawimawina ni atan hman thin a ni ta a. September 1, 2025 leh August 31, 2026 inkar khan India ram pumah police mi 154 zetin ram leh hnam tan nunna an hlan a. Kumin chhung hian vanneihthlak takin Mizoram Police zingah duty laia hmelma kuta thi an awm lo a, kum 1966 atanga vawiin thlengin Mizoram Police zingah, ram leh hnam tana nunna hlan mi 54 lai an awm tawh a ni.

Mizoram-ah pawh October 21, 2026 zing dar 7 khan Police hmunpui hrang hrang, District Headquarters leh Battalion Headquarters-ah te Commemoration Parade hi neih a ni a. Mizoram Police hnuaia Commemoration Parade hmanna pui ber hi "Martar Thlan", 1st Bn. MAP Headquarters, Armed Veng, Aizawl-ah neih a ni a, DGP, Mizoram Police senior officer-te bakah Sister agencies atanga officer lo kalte nen urhsun taka martarte sunna neih niin, martar thlanah zahna pangpar dah a ni.

National Level-ah chuan October ni 21, 2026 zing dar 07:55 khan Police Commemoration Day 2026 Parade chu National Police Memorial (NPM), New Delhi-ah hman a ni a. He hun pawimawh takah hian Hon'ble Union Home Minister chu Chief Guest niin a tel a ni. He hunah hian kum khat liam ta chhung a Police thawklaia nunna chan tahte hming chu Director Intelligence Bureau (DIB)-in a chhiar chhuak a; CAPF-te leh Delhi Police te tangdun chuan parade an buatsaih bawk. Hon'ble Union Home Minister hian NPM atangin Motorcycle Rally a vailiam bawk. He Motorcycle Rally team te hian October ni 31 khian Kevadia, Gujarat-a Ekta Parade-2026 ah an telpui dawn a ni.

Mizoram Police atangin mi 8 awmna Motorcycle Rally Team chu October ni 6, 2026 khan PHQ Aizawl atangin Pu Sharad Agarwal, DGP Mizoram chuan a lo vailiam tawh bawk a, anni pawh hian October ni 31 a Kevadia, Gujarat-a Ekta Parade-2026-ah an telpui bawk ang.