Ramchhung hmun dangte rualin Oil and Gas renchem chawlhkar (Oil and Gas Conservation Fortnight) chu vawiin khan I&PR Auditorium a inkhawm buatsaihah FCS&CA Minister Pu H. Rohluna’n a hawng.

He hun hawnna inkhawm hi Secretary and Director FCS&CA Pi M. Zohmingthangi’n a kaihruai a. Fortnight hawngtu FCS&CA Minister chuan Mizoram chhunga oil leh gas harsatna tawh mek hi rampum leh khawvel huap thilthleng a nih avangin a ren thiam kan zir tlan a pawimawh ber zawk ang, a ti. Pu Rohluna chuan ramchhunga gas harsatna hi sorkar laipui pawhin ngaimawh thamah a neih tawh avangin kalphung thar (policy) a chhawp chhuak mek a. Chumi ang chuan chhungkaw khatin kum khat chhungin gas bur 6 man tlawm zawka pek leh a bak erawh manto a hralh chhuah dan a ngaihtuah a. September 2012 to March 2013 chhung hian chhungkaw tinin bur 3 theuh subsidize rate a la thei tur kan ni, a ti. Hetihlai hian subsidize rate cheng 60/ 70 vela tihsan a chhungkaw khatin kum khat chhunga an lak theih tur bur 9 a tihsan rawtna pawh sorkar laipuiah ngaihtuah mek a ni, a ti bawk. Minister chuan India ram pum oil mamawh za a sawmhnih chauh ram chhunga tharchhuah a nih avangin oil harsatna pawh hi ngaimawh tham a tling tawh a. Chuvangin lirthei chi hrang hranga hmangtute pawhin tul lova hmanloh kan zir thiam a ngai a ni, a ti. Mizoram chhungah hian oil leh gas a awm ngei ni a rin a nih thu sawiin Minister chuan gas chu a awm ngei tih finfiah a ni tawh a. Heng tharchhuah te pawh Mizoramin a tam thei ang ber a chhawr theih nan sorkar laipuiah chak taka kawng dap mek a nih dan a sawi.

Inkhawmah hian Transport Jt. Director Dr H. Lalthangliana, Horticulture Deputy Director Raphael Thasiama, LPG Distributors aiawhin an Secretary Pu H. Zosangliana, Mizoram Consumers Union Treasurer A.Lalhmangaihzuala bakah IOC Ltd. Mizoram Co-ordinator Pu RK Mohan Singh te chuan thupui thlanbik hmangin thu an sawi a. FCS&CA Addl. Director Pu Lalduhthanga’n lawmthu sawiin hun hnung a khar a ni.