Vawiin khan Economics & Statistics Department buatsaihin Kolasib BRC hall-ah Registration of Births & Death Training buatsaih a ni a. Training hi Aizawl atangin Pu Lalrikhuma Sailo, Jt. Director, Economics & Statistics leh a hote mi pathum in an pe a ni.

Kolasib khaw chhunga Registration of Births & Death a thawktu Registrar 40 rual ten training hi an nei a ni. An hnathawh kawnga pui thei tur ang an zir tamtak te chu an hlawkpui hle a ni.

India sorkarin nau piang leh thi zawng zawng chhinchhiah vek turin hma a la a. Mizoram hi a ti tha pawl tak kan ni nachungin za a za hlawhtling tur chuan hmabak kan la ngah hle tih training ah hian sawi lan a ni. Nau piang leh thi reng reng chu ni 21 chhunga mahni khua/ veng chhunga Registrar, Reg. of Births & Death hnena report thin turin mipuite chu ngen an ni a, a hun chhunga in report loh chuan man chawia Magistrate phalna laka harsa taka Directorate of Economics & Statistics, Aizawla tih a ngai tawh a ni. Tunlai hunah phei chuan Birth certificate tel lovin thil a tih theih tawh mangloh avangin hei hi a pawimawh takzet a ni tih training-ah hian tarlan a ni bawk a ni.

Mahni piankum tihdanglam duha Economics & Statistics Department a dilna siam thinte an awm thu leh amaherawhchu kum 1985 atnga piang leh thi te record vawn anih tak avangin tih danglam mai mai theih a ni lo tih Department hotute chuan sawiin Baptisma certificate pek chhuah kawngah pawh Kohhran hrang hrang te chu fimkhur turin an ngen a ni. Statistics rintlak nei turin tan lak anih thu leh Kolasib-ah tun sawrkar kumchhung ngeia District Research Officer office hawn tum anih thu Department mite hian an sawi bawk a ni.