Mizorama leihnuai hausakna zawngtu company hrang hrang, Oil & Gas Exploration Team ten, Pu C.L Ruala, M.P.(Lok Sabha) kaihhruaina hnuaiah vawiin khan Chief Minister Pu Lal Thanhawla chu a Office chamber-ah an hmu.

 

 

Heng company hrang hrang te hi India ram chhung leh ram pawn lam a mite an ni a. Reliance Natural Resources Ltd atangin Dr.V.K. Rao, Adviser (E&P) leh Sudhir Jain, Addl Vice President; Naftogaz Ltd (Russia) atangin Keder Mehdoom, Gen Manager; Geopetrol Incorporated (France) atangin Eric Blehant, Geologist; ONGC atangin S.Choudhury, Group Gen Manager leh Ranjit Shyam, Dy Gen Manager (Geology ) bakah Oil India Ltd. atangin Barthakur, Chief Geologist, C.Laldinkima, Geologist leh Khulsherah,Head Geophysics (NEF) te an ni.

Heng company-a mithiamte hian an hmalak tawhna leh an hmalak mekte chu Chief Minister hi hrilhin, mamawh an neihte pawh an thlen a. Chief Minister chuan mamawh leh tul ang te chu enzui zel a ni ang a ti.

Tunah hian heng company hrang hrang te hian Mizoram chhung Sq.Km 12172 zetah beihpui an thlak mek a. Hei hi Mizoram geographical area chuan 58.9 % zet a zau a huap a ni. Hma an lak tawh chinah lungawi thlak an tih thu sawiin, oil leh natural gas awm ngeia an hriat thu an sawi bawk a ni.

Chawhnu lamah New Capital Complex Secretariat Conference Hall-ah Pu R.L.Rinawma, Secretary to Govt of Mizoram, Industries & Mines Department hovin meeting pawimawh tak an nei zui a ni.