Vawiin khan Oil India Limited (OIL) chuan kum 2014 Santosh Trophy Champion, Mizoram Team hnenah lawmpuina tangkafai an hlan. I&PR auditorium-ah lawmpuina hun hi hman niin Sports Minister Pu Zodintluanga chu khuallian a ni.

Pu Zodintluanga chuan Oil India Ltd. chungah lawmthu sawiin rampum huap sumdawng lian te zingah Mizoram Footballers-te chawimawina hlan hmasa ber an ni, a ti a. Hei hian players te mai bakah a buaipuitu Association leh sorkar a tiphur hle tiin he an thawhhona hi a bul tanna chauh ni se, sports discipline dangah pawh Mizo thalaite nawr kaltu an nih chhunzawm ngei a beisei tih a sawi. Sports Minister chuan stadium puitlung tak tak pawh la neilo, infrastructure leh coaching staff chungchangah pawh la baihvai tak ni chunga Mizoram Team-in ramchhung team tha te hneh a, India rama football champion an ni thei ta mai chu lawmawm a tih takzet thu a sawi a. He hlawhtlinna hi mi thahnemngai te’n mittui leh thlantui luang chunga an sual chhuah liau liau a ni, tiin Mizote hi India ram chauh ni lo, khawvel champion kan la nih theih tur zia a tilang chiang hle, a ti bawk.

OIL hian Mizoram Football team-a player leh official te hnenah tangkafai Rs. 20,000 theuh an hlan a ni.

Lawmpuina inkhawmah hian OIL North East Frontier (NEF) General Manager Dr. R.Dasgupta leh MFA Secretary Pu Lalnghinglova Hmar te’n thu an sawi a. Sports Director Pu Lalzirmawia Chhangte leh Mizoram State Sports Council Secretary Pu C. Laltlanthanga te pawh inkhawmah hian an tel a ni.