He thu hi Pu Lal Thanzara, Minister of State leh Mizoram Football Association President ni bawk chuan vawiin chawhnu a Ramhlun South YMA Hall a Ramhlun South Local Council te huaihawt 2nd NECS Cup Champion lawmna hun buatsaih tak a a sawi a ni. NECS Cup, 2014 champion lawmna ah hian Champion in a dawn tur tangka fai Rs 1,50,000 leh Champion No mawi baka Best player leh Fair Play Award-te dawngtu Ramhlun South Local Council team player te leh manager te hnenah chawimawina thuziah leh lawmpuina thil dang te hlan a ni.

Pu Lal Thanzara chuan team 172 zinga pakhatna dinhmun hauhtu Ramhlun South Local council team te chu chawimawi tlak an nih thu a sawi a. An mahni tantu leh thurualpui tlattu veng mipui leh khawtlang hruaitute pawh an hlawhtlinna ah an thawh hlawk hlea a hriat thu a sawi a ni. Minister chuan Sawrkar phurpuina te leh mi inphal deuhte zarah Mizoram in infiamna khawvel ah hma a sawn nasa hle a ni a ti. Tunhma deuh kha chuan Football khelh te leh infiamna dang luhchilhtute kha an lo hlawk lo thin mai pawh nilovin an hek zawk thin a. Tunah erawh chuan sawrkarin thalaite tan khawvel thar a siam sak a hlawk thlakzia chiang takin a lang mek zel a, Football ah bik phei chuan he hlawhtlinna lian tak tak kan thlaiten an tem tan tawhin India ram a Club tha ber ber a khel mekin anchhungte an chawm tawh a ni a ti. Infiamna khawvel tih hmasawnna kawngah chauh Sawrkar in kut a thlak lova. Hriselna kawng leh ei leh bar kawngah te leh hmasawnna atana pawimawh em em kawngpui siam hna thawh kawng ah te chak takin Sawrkarin hma a lak mek zel thu a sawi. Hmalakna hrang hrang ah te mipui thlawpna hmuh tur awm thin te leh NGO pawl hrang hrang ten neitu rilru pua sawrkar project te an vilpui thin hmuh leh hriat a nuam a, hmasawnna kawng kan zawh mek a ni tilang tu a ni a ti.

2nd NECS Cup lawmna inkhawm hi Pu Kapthangvunga, Chairman, Ramhlun South Local Council in kaihruai a.He hunah hian Pu B.Lalawmpuia, Team manager in report tawi a pe a, khualzahawm Pu Robert Romawia Royte, CMD, NECS pawhin thusawina hun a hmang a ni.