Oil leh natural gas atanga hlawkna state sorkar leh company ten a inzata insem tur chungchang ni 7.7.2014 a Maubuanga Oil India Limited in tuialhthei verh chhuahna tur khur (oil rig) Chief Minister Pu Lal Thanhawla’n a hawn tuma a sawi, a tuk ni 8.7.2014 a Vanglaini chanchinbu in ‘Oil India Maubuangah lei an verh tan, Chief Minister leh Oil India thil hriat a inang lo’ tia a chhuah chungchangah Chief Minister thusawi a dik zawkzia leh OIL hoin Govt.of India thutlukna an hriat loh zia State Nodal Dept, Directorate of Geology & Mineral Resources chuan a sawifiah.

12th Finance Commission in ‘New Exploration Licensing Policy’ hnuaiah “Non Tax Revenue” atanga an sum hmuh Central leh State Sorkar insem dan turah 50:50 nise tiin a rawt a. Govt of India in he rawtna hi a pawmpui a, Mizoram MP(Lok Sabha) Pu C.L.Ruala’n March ni 11, 2010 a Starred Question No.207 (d) zawhna Union Petroleum Minister in a chhannah chuan ‘Non-tax Revenue Profit’ hi 50:50 a insem tur anih thu alo tarlang tawh bawk a ni.

Tun dinhmunah oil leh gas kan hmuh chuan Mizoramin hamthatna kan hmuh theih tur chu hetiang hi a ni : i)Royalty on oil - 12.5%, ii) Royalty on gas - 10%, iii) Non-tax Revenue Profit - 50% leh iv) Oil/Gas zawnna area zau dan azirin “Licence Fee” State sorkarin a dawng bawk ang.

Tunah hian Mizoram chhunga oil & gas zawng, company / Agency te atangin ‘licence fee’ kumtin Rs.3 Crore dawn lai kan dawng thin a. Chipchiar zawka hre duh tan Directorate of Geology & Mineral Resources ah zawh fiah theih a ni.