Vawiin khan Agriculture Minister Pu H. Liansailova, Chairman Mizoram Oil Palm Advisory Committee kaihhruaina in Agriculture Committee Room, Directorate of Agriculture-ah Mizoram Oil Palm Advisory Committee vawi 9-na neih a ni a. Oil palm ching kawnga hmalak tawhna thlir hovin hmalak zelna atan ruahmanna an siam a. Company te hmalak chhoh zel dan tur leh Oil Palm rah sawngbawlna Oil Palm Factory an din dan turte uluk tak a sawi ho a ni. Tunah hian Oil Palm hi district paruk (6) i.e. Aizawl, Kolasib, Mamit, Serchhip, Lunglei leh Lawngtlai ah te chin mek a ni.

He meeting ah hian Agriculture Director, Dr. C. Lalzarliana chu meeting Secretary niin Oil Palm hmalakna hrang hrang a tarlang a. Oil Palm phun tawh zat leh tuna la dam zat chhiarpui (Oil Palm Population Census, 2012 ) neih a ni a, hetiang in : a) Mizoram a Oil Palm kung awm zat : 797093 nos., b)Oil Palm chin na ram zau zawng : 5,492 Hactare.

Kumin 2012 hian Oil Palm ching duhte hnenah Oil Palm tiak sem mek a ni a, ram hectare 2650 a zau cover theih beisei a ni. Nakum 2013-2014 hian ram 6000 Ha. a zau a ching turin ruahmanna siam a ni.

Oil Palm rah (FFB) hi Company ten a hmunah Rs. 4.75 zel a leiin kum 2008 atang khan 424.496 Mt an thar chhuak tawh a, Rs, 1476.48 lakhs man zet Oil Palm chingtuten an hralh chhuah tawh a.

Meeting ah hian Company pathum (3) Godrej Oil Palm Ltd., Ruchi Soya Industries Ltd., 3F Oil Palm Agrotech Pvt. Ltd. ten Oil Palm Factory dinna atan a an hma lak mek dan sawifiah a, tun atanga reilo teah Factory hi hman theih turin hma an lak mek thu an sawi a ni.