Vawiin khan State Play Fields Association of Mizoram (SPFAM) meeting vawi 1-na chu an Chairman Sports Minister Pu Zodintluanga hovin a office chamber-ah neih a ni a. SPFAM member-te inhmelhriattirna leh pawl hmalak zel dan tur ngaihtuah ho a ni. SPFAM meeting hmasa ber hi Parliamentary Secretary, Sports & Youth Services leh SPFAM Sr. Vice-Chairman ni bawk Pu S. Laldingliana’n a kaihruai a ni.

SFPAM Chairman Pu Zodintluanga chuan Ministry of Youth Affairs & Sports-in ramchhung hmun hrang hranga khelmual humhalh leh enkawl chu ngai pawimawhin state tinte chu Play Fields Association din tura hriattir an nih thu a sawi a. SPFAM hmalakna tur atan hian sorkar laipui atangin cheng nuai 50 dawn a nih tawh thu a tarlang a. Mizoram district zawng zawngah sports discipline hrang hrang hmanlai khelmual awm ang angte humhalh leh enkawl turin District tina Sports Association te hnenah sum hi sem a nih tur thu a sawi bawk a ni. Ministry-in a duh danin SPFAM hi kum 1-ah vawi 4 thukhawmin hmalak tawhte thlirho leh ruahmanna thar siam a ni zel ang a, tun atanga reiloteah General Body meeting pawh koh a ni ang, a ti.

Vawiin SPFAM Governing Body thukhawm chuan an ngaihtuah pawimawhte zingah Ministry of Youth Affairs & Sports atanga sum hmuh leh hman dan chungchang te, Play Field zawng zawng registration leh data sengkhawm chungchang bakah SPFAM Office leh Staff inrelbawl dan tur te an rel a. Meeting-ah hian Mizoram State Sports Council Secretary leh SPFAM-a Chief Executive Offcier ni bawk Pu Lianzuala chuan SPFAM din chhan, a tum leh hmachhawp inhrilh hriatna hun a hmang a ni.