Nimin khan Kolasib Diakkawn YMA Hall-ah Agriculture Department buatsaihin Oil Palm Farmers Meet cum Awareness Campaign neih a ni a. He hun hi Pu K. Lalrinthanga, Parliamentary Secretary i/c Horticulture etc. in a hmanpui a ni.

Dr. C. Lalzarliana, MAS, Director, Agriculture (Crop Husbandary)-in a kaihruai a. Khuallian Pu K. Lalrinthanga chuan thu sawiin Sawrkar tanpuina a Oil Palm chingtute chu tan la nasa hle turin a fuih a. Thlai tha leh hlawk, chhungkaw sum bawm tipung thei, ramchhung economy pawh siam danglam dawrh thei a nih avangin a chingtu ten tihtak zeta tan in lak a, in hlawhtlinpui ngei ka duh a ni, a ti a. Indonesia ramah te chuan an Oil Palm chin avangin an ram a hausak phah hle tawh a ni, a ti. Oil Palm hmang hian kan tu leh fate tana eizawnna leh hausakna i siam ang u, a ti bawk. Mizoram sawrkar chuan inthlan dawna kan Manifesto bawhzui zelin a tih hlawhtlin kawngah englai mahin tha a thlah ngai lo a ni, tiin tui thianghlim in tur lak kawngah te, Medical college Referral Hospital Falkawn a din tur te Hydel Project siam kawngah leh NLUP chak taka bawhzui nate chu a langsar zual a ni, Pu K. Rinthanga chuan a ti a ni.

He huna Guest of Honour Pu Lalfela Sailo, Addl. DC, Kolasib chuan, Oil Palm chin chu a hralhna chiang sa a nih avangin thil phurawm tak a ni, a tia. Sawrkarin a tiak min pek aliamah pangchang lutuk lovin ngawrh takin kan thlai chin hi i hlawhtlinpui ngei ang u, a ti a ni.

Pu RK. Nithanga, Dy. Direcror Agriculture chuan Oil Palm chin dan milem nena pho chhuakin zirtirna a pe a. Pu R. Lalnunzira, DAO, Kolasib chuan report a pe bawk.

Kolasib District-ah hian kum 2005 khan Oil Palm hi chin tan a ni a, tunah hian ram 5327 Ha. a zauvah farmer 1500 velin an ching mek a ni. Oil Palm hi khaw 34 ah chin mek a ni a. Zonal Committee leh Oil Palm Growers Society te dingin farmer ten phur takin an kalpui mek a ni.