Kolasib District chu Mizoram sawrkarin Oil Palm District-ah a puan tak avangin Oil Palm chin uar lehzual turin ngawrh taka tan lak a nit a, Bukvannei-a Oil Palm Factory pawh hna thawk thei tura engkim peihfel a nih tawh bawk avangin nitina a her theih tur zat tam tham thar chhuah a ngaih avangin a chingtute an pun thar a ngai a. Hei vang hian sawrkar flagship programme NLUP 3rd leh 4th phase dawngtu zinga za zela 80 te chu Oil Palm chin thlang turin sawrkarin a beisei ta a ni.

NLUP kalpui dan tur ruahmanna thar sawrkarin a duan, khaw pakhat tan a hlawm rualkhai zawka trade inang thlan, One Crop One Village chungchangah zirtirna pawimawh tak nimin khan Kolasib AMFU Hall-ah District Level Implementing Committee on NLUP chuan a nei a. Nodal Officer NLUP & Addl. DC Pu Lalfela Sailo chuan a kaihruai a. District chhung khaw tina VC President leh Secretary kalkhawm te chu NLUP trade thlan dan mumal zawk he hunah hrilh an ni a, an khua theuhva beneficiary te hlan chhawng tura tih an ni a, Line Deptt. tinten an hnuaia trade thlan chungchang leh mumal zawka NLUP kalpui dan tur an sawi hlawm a ni.

Tun hnaia Chief Minister hova NLUP Implementing Board thukhawmin alo rel tawh angin tun 3rd & 4th phase ah hi chuan One village One crop anga kal a, khaw zau khat / khaw khat ami ten eizawnna chi khat an tih tlan a tul tawh dawn tih tarlan a ni a. Kolasib District Implementing Committee Secretary Pu R. Lalnunzira, DAO chuan tun dinhmunah Oil Palm chin uar a tul hle thu sawiin Oil Palm factory in a her tur Rah a neih ngah loh chuan Mizoram sawrkar leh Godrej Company inremna a thlawn mai ang tih a hlauhawm bakah rei hna thawk thei lova factory hi chawlh mai a ngai ang tih pawh a hlauhawm thei a ni, a ti.

Bukvannei-a Oil Palm Factory ah tunah hian Oil Palm rahte chu her tan tawh a ni a, a crude oil chu lak a niin tam tham her a nih hunah Refinery hnai berah thawn thin a ni dawn a ni. Kolasib District chhungah hian Oil Palm collection Centre 26 Godrej chuan a siam a., heng atang hian Factory ah thlenpui thin a ni ang, tuna thar chhuah zawng zawng atanga chhutin thla khat zelah ni 4 her daih chauh ala ni rih a. Amaherawhchu thar chhuah hi ala pun chhoh beisei a ni a. A nih ang taka her a chhawr tangkai tak tak tur chuan a chingtu mi engemaw zah an awm belh a ngai ta a ni.