Mizoram State Tobacco Control Society (MSTCS) leh Indian Society on Tobacco & Health (ISTM) Mizoram Chapter tangkawp chuan vawiin khan I&PR Conference Hall-ah khawvel huapa vaihlo hman dan zirchianna GATS neih leh tur chungchunga inbuatsaihna chikhat atan hemi chungchang sawihona Focused Group Discussion (FGD) on Action Plan for GATS tih chu an buatsaih. District hrang hrang atangin Anti Tobacco Squad Member Secretary te, MZP, MSO, LSA leh MJA aiawhte bakah sawm bik mithiam hrang hrangte leh kohhran lam hruaitute an tel bawk a ni.
Sawihona hi chhawng hniha neih niin Session hmasa zawk Dr.Jane R.Ralte, State Nodal Officer cum Project Officer, MSTCS kaihhruaiah hian FGD neih dan tur inhrilhhriatna neih a ni a. Kumin kum tawp lam December thla emaw nakum kum tir lam January thla vela Global Adult Tobacco Survey (GATS) neih turah chak zawka hma lak dan tur inbuatsaih lawkna chungchangah group 6 a inthen in sawihona hun neih a ni.
Pu R.L.Rinawma, Principal Secretary, H&FW chuan session hnihna hmanpuiin Pi K.Ropari, Principal Director, H&FW chuan he hun hi a kaihruai a. Session 2-na ah hian Session 1-na a Group Work neih chu Group tin aiawh ten Powerpoint presentation hmangin an group te ngaihdan thawh khawm present-na hun an nei.
Pu R.L Rinawma’n kalkhawmte lawmna thu sawiin, heti taka training hlawhtling huaihawt a nih theihna atan kalkhawmte leh tha thawh tu te chungah lawm thu a sawi. Mita hmuh theih inzirtirna ah kan harh thar a, chhungkua ah theuh zuk leh hmuam that lohzia inzirtirna kawngah tan lak nise,a ti a. Zau zawka zirtirna kan neih theih nan print leh electronic media lamah leh vengchhung chanchinbu thleng pawhin hmalakna chhunzawm zel a pawimawh a ni, a ti bawk. Vaihlo sim tawh ten an theihna kawng kawngah mipui zirtirna pe in tan lo la zel se tiin vaihlo sim tawhte a sawmin a ngen a. GATS survey neih leh a Mizoram hmingchhe tawh lova hma kan sawn theih nan tan kan lak thar theuh angaih thu a tarlang bawk.
GATS hi vaihlo chungchanga Mizoram dinhmun hriatna tur a nih avangin tan nasa tak a kan lak hi a pawimawh hle a. GATS hi 2009-2010 khan neih niin, khami tum a an hmuh dan ah chuan Mizoram hi vaihlo hmanna lamah a sang hle a ni.
