UN Mission Technical Team member, Pu Sandeep Tandon (UNIDO), Ms Manjula bhyan (UNIDO), Ms Antonia Paliwal (FAO), Ms Kalpana Tawakley (UNDP), leh Pu Sanjeev Kumar Gupta (UNDP) te chuan vawiin khan Serchhip District tlawhin NLUP Line Department official te an kawm. UN Team hian Serchhip an luh hma hian Baktawng Tlangnuam tlawhin NLUP hnuaia Carpentry leh Bungbel siamna te an tlawh a, hemi hnu hian Chhingchhip a MIFCO Processing Plant leh S.K Bamboo Chipping Industry an tlawh leh a, tlai dar 5:00 vel khan Serchhip lutin DC Office a Video Conferencing Hall ah Serchhip Bawrhsap mawhphurhna la mek tu Pu V.L.Remliana Addl. DC leh NLUP Line department hotute bakah Thuthar thehdarhtute nen inkawmhona hun an hmang a ni.

UN Team chuan Serchhip District an tlawh chhan pakhat chu hmasawnna hna thawh kawng a mipuite leh sawrkar hmalak tawh dan bakah harsatna an tawh te zirchian a, UNO in engtin nge a tanpui theih ve ang tih ngaihtuah ani tih thu an sawi a, abik takin NLUP thil tum zing ami Ecosystem Management, Bamboo Development, Horticulture lama hmalakna te bakah land-based hmalakna te chu an ngaipawimawh ani tih an sawi a, NLUP Line Department hrang hrangte chuan a mal te te in an hmalakna leh an hmasawn dan te, harsatna an tawh te an sawi a, UN Team pawhin zawhna chi hrang hrang zawtin harsatna sutkian theih dan tura kawng tha ni a an hriat te an sawiho a. NLUP hnuaia thlai chingtute tan hectare khat mila ruahmanna siam chu a aia hectare zau zawka kalpui theih ni se tha lehzuala an rin thu an sawi a. Piler khua a Coffee ching hlawhtling te chanchin an ngaihthlak chuan a tiphur hle tih sawiin Coffee Board kaltlang lovin “Mizo Coffee” tih hming chawiin emaw a rim diktak pu chunga hralhchhuah nise a hlawkin a hlu lehzuala an rin thu te an sawi a, hetianga Coffee a that theih chuan nasa lehzuala chin dan tur ngaihtuah pawimawh a an hriat thu an sawi bawk a ni. UN Team hian Line Department te hi NLUP chungchang an zawt chik hle a ni.

UN Team chuan Chhingchhipa MIFCO Processing Plant an tlawh chuan thil tam tak a ngaihtuah tir thu an sawi a, raw materials awm that loh vanga hna anih tur anga thawh theih a nilo chu pawi an tih thu leh uihawm an tih thu an sawi a, hmanraw changkang ber ber nena thuam anih laia a hnathawh tur ang a thawh theihlohna hi NLUP kaltlanga theirah chin chuan a phuhruk thuai theih ngei an beisei thu an sawi a ni.

UN Team hi Serchhipah an riak ang a, naktuk zingah Lunglei an pan ang.