Ni 11 June 2014 khan District Agriculture Office, Lunglei chuan 'Oil Palm Flag-off-cum-Framers' Training' a buatsaih a, he hunah hian Dr.C.Lalzarliana, Director of Agriculture (Crop Husbandry) chu khuallian niin Lunglei District chhunga loneituten kumin (2014-2015) chhunga an phun tur Oil Palm tiak a vailiam a ni.

He Flag-off programme hi DAO Lunglei Pu J.Rothanga-in a kaihhruai a, khuallian Dr.C.Lalzarliana chuan loneitute fuihna thu sawiin Oil Palm pawimawh leh tangkaina a hrilhfiah a, Mizoram sum leh pai dinhmun chawisan theihna kawng tha a nih thu a sawi bawk a ni.

Flag-off neih hnu hian Pu RK Nithanga, Dy. Director of Agriculture (Oil Palm) leh Pu Tlangtinmawia Zote, Technical Officer to DA ten technical training hun an hmanpui a. Mizoram chhung ngeia district danga Oil Palm leh Oil Palm Mill documentary te enho a ni. Kumin chhung hian Lunglei District chhung khaw 51-ah Oil Palm tiak 1,24,118 sem chhuak hman turin Agriculture Department-te hian tan an la mek a, hei hian hectare 856-a zau a tuam dawn a ni.

Kumina Oil Palm tiak vailiam tak hi District zawng zawnga ti tha ber nia report dawn a ni a; tunah hian Lunglei District-a Oil Palm lo ching hmasate chuan a rah hi an hralh chhuak tawh nghe nghe a ni.