Vawiin chawhnu dar 1.00 khan Kolasib-ah Oil Palm chingtute zinga company hnena an thlai thar hralh chhuak mek mi 128 hnenah anmahni chophurna atan leitha, Rs 3,000/- man hu theuh  sem a ni a, he hun hi DAO office-ah hman niin, Agriculture Director Dr. C. Lalzarlianan a hmanpui a ni.

Oil Palm hi 2004 atang khan Kolasib District-ah uar taka chin tan a ni a, chhungkaw 765-in an ching mek a, an tharchhuahte hi leisak turin company 3 nen Agriculture Department chuan inremna an ziak a ni. Oil Palm hi India ram chuan hriaka intodelhna turin uar takin a chintir mek a ni. Oil Palm hriak hi Mizoram-a a chingtute zingah ei siamna tel atana an hmang an awm a, uluk taka sawngbawl a nih loh chuan oil palm hriah hian acid a tam avangin ei atana hmang lo turin Agriculture Department chuan mipuite hnenah thu a rawn a ni. Kolasib district-ah hian kumin chhung hian Godrej Company chuan oil palm hi metric tonne 1000 lei hman an tum a; tun tuma leitihthatna (fertilizers) hian an thlai thar a tihhlawk ngei an beisei thu an sawi.