Information & Public Relations Department leh Mizoram Art Development Society (MADS) tangkawpin naupang leh tleirawlte tana On the Spot Painting Competition an buatsaih thin chu vawiin khan a vawi thum nan neih leh a ni a. He intihsiakna, Oasis Higher Secondary School, Tuikual a neihah hian Pu David L. Thangliana, I&PR Director chu khuallian niin lawmman a sem nghal a ni.

Khuallian chuan naupang te te lemziak a tui chho an awm thar zel chu thil lawmawm tak a nih thu sawiin, lemziak chu khawvela hnam chi hrang hrangten fiah taka an hriatthiam tlan theih tur thu ril leh ropui tak tak puanchhuahna hmanrua a nih thu a sawi a. Vawiina lemziah intihsiaknaa tel te chuan an zirna thlahthlam si lovin an talent dawn ropui tak chu tipung zel turin mi thiamte rawn tel chung zelin leh internet-te hmang tangkai thiam turin a fuih a ni. I&PR Director chuan MADS nena thawhhona tha tak department in a nei chhunzawm thei zel chu lawmawm a tih thu sawi telin, Mizoramin Art lama hma a sawn zel theih nan tan tlan zel pawimawh a tih thu a sawi bawk.

Vawiin programme hi Pu Laltanpuia, MADS Vice President chuan kaihruaiin, Pu V. Lalzawmkima, Secretary chuan report a pe a. Pi Lallianpuii, I&PR Joint Director leh Nodal Officer for Art and Film ni bawk chu a tel bawk.

Tun tum On the Spot Painting Competition hi Category hnih a then niin, Category-I ah hian kum 16 atanga kum 18 inkar an tel a, a vaiin participant 7 awmin an inelna theme chu “Kawtchhuah”, “Zawlbuk” leh “Mizo Traditional Dress” te a ni. Category-II ah hian kum 12 atanga kum 15 inkar telin, participant 21 an awm a, “My Dream House”, “My Garden” leh “My Favourite Animal” tih theme hmangin lem an ziak thung. Category-I ah hian lawmman pakhatna in Rs. 4,000, pahnihna in Rs. 3,000 leh pathumna in Rs. 2,000 an dawng a, Category-II ah hian lawmman pakhatna in Rs. 3,000, pahnihna in Rs. 2,000 leh pathumna in Rs. 1,000 an dawng. An vai hian Certificate leh Trophy an dawng bawk. Lawmman dawngtute bakah hian category pahnih ah hian consolation prize siam a ni bawk a, consolation prize dawngtute hian certificate leh pawisafai Rs. 500 an dawng a ni.

On the Spot Painting Competition vawi 3-naa lawmman dawngtute chu hengte hi an ni:

Category-I:

First Prize: Lalthlamuana, Ramhlun Vengthar

Second Prize: Lalrinchhana, Vaivakawn

Third Prize: John Lalnunsanga, Chhinga Veng 

Category-II:

First Prize: Samuel Lallawmzuala, Kawlkulh

Second Prize: Lalrindiki, ITI Veng

Third Prize: Ramthlanmawii, Zemabawk