March ni 22 hi khawvel pumah World Water Day a nih angin, Aizawl-ah pawh PHE Department chuan vawiin khan he Ni hi an hmang a, kumina thupui chu ‘Nature for Water’ tih a ni. Hawla Auditorium-a he ni puala programme buatsaihah Mizoram State Planning Board Vice-Chairmam Pu H.Liansailova, IAS (Rtd) chu khuallian a ni.
Pu H.Liansailova chuan khawvel siamtu Pathian chuan thil nung tinrengte inchawm tawna, nunna atana inring tawn turin a siam a, a thilsiamte enkawl tura mihring a dahte hi a ti bawrhbangtuah kan tang fo thin, a ti a. Pathianin mawhphurhna min pek kan hlen chhuah loh avangin keimahni ngei pawhin kan tuar dawn a ni, a ti. Tui mamawhna a sang chho zel a, lo leh thlai thar nan mai bakah hmasawnna kawng tinrengah tui kan mamawh a, kan nunna atana pawimawh tui humhalh turin kan harhchhuah a ngai a ni, khuallian chuan a ti a. Tui hna humhalh mai bakah nungcha tinrengte leh thing leh maute humhalh turin sawrkar chauh ni lo, mi zawng zawngin mawhphurhna kan nei tih hriaa khaw tina Village Council leh Local Council ten kan vei a hun tak zet a ni, a ti. Planning Board Vice Chairman chuan PHE leh CYMA thawhdunna fakin YMA chu kan ram tana pawimawh, sawrkar leh khawtlang puihbawm a ngaihna leh hnawhkhah ngai a awm apianga hnawhkhatu an ni a, tuihna humhalh kawnga PHE nena an thawhhona pawhin rah tha a chhuah zel nia a hriat thu a sawi bawk.
He programme-ah hian PHE Secretary Pu KT Beichho, Central YMA President Pu Vanlalruata leh Dr.Lalnuntlunga, Mizoram University te pawhin tuihna humhalh tul zia leh mi tin mawhphurhna a nih zia sawiin hma sawn kan ngaihna nia an hriatte an tarlang a ni.
Kum 1992 United Nations Conference on Environment and Development (UNCED), Rio de Janeiro khawpui Brazil-ah khawvel hian World Water Day hman a lo rawt tawh angin a kum leh 1993 March ni 22 chu United Nations General Assembly chuan "World Water Day-Tuithianghlim Lawm Ni" hmasa ber atan a puang a. Kum tinin March 22 hi World Water Day atan Khawvel hian alo hmang chho ta zel a ni. World Water Day ah hian Tuithianghlim leh Tui intlak pawimawhna hre chiang deuh deuh tur leh Tuithianghlim intlak tlachham lova kan awm theih nana hma thar la zel turin United Nations General Assembly chuan mi zawng zawng a beisei a ni.
World Water Day pual hian slogan inphuahsiak neih a ni a. Chuta lawmman la tute chu -
WaterWise 2018 winners: 1st- C. Lalrinchhana, Khawhai
2nd- Lalrinmuana, Rep. Vengthlang
3rd- Lalsiamliana, Tawipui South
ZoSAN 2018 Winners: 1st- K. Hmingthankaia, Aizawl Venghlui
2nd- Lalchhandama- Chaltlang Lily Veng.
3rd- Remmuana Lunglei
Graphix Designing 2018
1st- Lalhmingliana, Venghnuai
2nd- R. Lalawmpuia, Bungkawn
3rd- Zodinsanga
Consolation
- Lalchhanchhuaha, Tlangnuam
- R. Lalawmpuia, Bungkawn
- Lalrinkima, Zonuam
- Lalrinzuala, AIzawl Venghlui
- Zomuanpuii, Venghlui
Waterwise
1st: Tuihnar humhalh nachang hre lo mi chuan chem lovin ama lu a la a ni.
2nd: I mamawh tawk hmang la, naktuk atan khawl rawh.
3rd: Tuihna i siam thei lo, i humhalh thei.
Zosan
1st: Khawlaia faina thawktu chuan khawlaiah chanchin tha a thehdarh a ni.
2nd: Fai tlin lo khawpa rethei an awm lo.
3rd: Faina tel lovin hmasawnna ziktluak a awm thei lo.
